Кеча, 2 январь куни тунда Венесуэла пойтахти Каракас шаҳрида бир нечта кучли портлашлар содир бўлди. Бу ҳақида BILD нашри хабар берди.

Унда айтилишича, маҳаллий аҳоли учиб ўтаётган самолётлар овози ҳамда камида еттита портлашни эшитганини, уларнинг айримлари ҳукумат бинолари атрофида юз берганини маълум қилган.

Мазкур портлашлар оқибатида шаҳарнинг жанубий қисмида жойлашган йирик ҳарбий база яқинида электр таъминотида узилиш кузатилган. «France-Presse» нашрининг хабар беришича, дастлабки портлашлар маҳаллий вақт билан соат 02:00 атрофида эшитилган. Ижтимоий тармоқларда катта ёнғинлар ва қалин тутун акс этган видео ҳамда суратлар тарқалган, бироқ портлашлар аниқ қайси жойда содир бўлгани ҳозирча маълум эмас.

Ҳозирда Венесуэла расмийлари томонидан ҳодиса юзасидан расмий баёнот берилмаган. АҚШ Мудофаа вазирлиги ҳам ушбу воқеаларга изоҳ беришдан бош тортган.

Қайд этилишича, портлашлар АҚШ президенти Дональд Трампнинг сўнгги баёнотларидан сўнг рўй берган. У аввалроқ Америка қўшинларининг Венесуэла қирғоқлари яқинида ўтказилган бир қатор операцияларидан кейин мамлакат ҳудудига зарба бериш эҳтимолини истисно этмаган эди.

Маълумки, икки давлат ўртасидаги кескинлик бир неча ойдан бери давом этмоқда. АҚШ Венесуэла ҳукуматини гиёҳванд моддалар савдоси билан шуғулланувчи картелларга ёрдам беришда айбламоқда. Президент Николас Мадуро эса, ўз навбатида, Вашингтонни мамлакатда беқарорлик келтириб чиқариш ва ҳукуматни ағдаришга уринишда айблаб келмоқда.