Фото: inbusiness.kz

Бош прокуратура ҳузуридаги Департамент Бухоро ва Наманган вилоятларида валюта айирбошлаш билан шуғулланиб келган шахсларни қўлга туширди. Бу ҳақда Департаментнинг матбуот хизмати маълум қилган.

Қайд этилишича, Бош прокуратура ҳузуридаги Департаментнинг Бухоро вилоят бошқармаси ва Миллий гвардия ходимлари ҳамкорлигида Бухоро шаҳрида тезкор рейд тадбирини ўтказган. Унда валюта айирбошлаш билан шуғулланиб келган У.Х. фуқаро М.Ҳ.дан жами 5 минг АҚШ долларини 62,7 миллион сўмга сотиб олган вақтида ашёвий далиллар билан ушланган.

Шу каби яна бир ҳолат Наманган вилоятида аниқланган. Департаментнинг Косонсой туман бўлими ва ИИБ ходимлари ҳамкорлигида ўтказилган тезкор тадбирда валюта айирбошлаш билан шуғулланиб келган фуқаролар Ж.У. ва Ш.Х. фуқаро Ф.Т.га жами 3 минг 200 АҚШ долларини 40,5 миллион сўмга сотган вақтларида ашёвий далиллар билан қўлга олинган.

«Мазкур ҳолатлар юзасидан Жиноят кодексининг 177-моддаси (валюта қимматликларини қонунга хилоф равишда олиш ёки ўтказиш) билан жиноят ишлари қўзғатилиб, тергов ҳаракатлари ўтказилмоқда», дейилади хабарда.

Аввалроқ, бир нечта ҳудудда «тадбиркор»лар 620 миллион сўмлик электрдан текинга фойдаланишмоқчи бўлгани ҳақида хабар берилганди.