Бугун, 5 декабрь куни ўз тарихида илк бор Жаҳон чемпионати йўлланмасини қўлга киритган Ўзбекистон терма жамоаси мундиал гуруҳ босқичидаги рақибларини билиб олади. Тошкент вақти билан соат 22:00 да АҚШ пойтахти Вашингтонда жойлашган «The Kennedy Center» мажмуасида 2026 йилги ФИФА Жаҳон чемпионатига қуръа ташлаш маросими старт олади.

Мазкур аҳамиятли тадбирда иштирок этиш учун Ўзбекистон Республикаси Спорт вазирлиги, МОҚ ва ЎФА раҳбарияти, Ўзбекистон миллий терма жамоаси бош мураббийи Фабио Каннаваро, мутахассислар ҳамда ФИФА томонидан махсус таклиф этилган ўзбек футболи афсонаси Миржалол Қосимов АҚШга етиб борган.

Миллий жамоа устози Фабио Каннаваро қуръадан олдин ўз фикрларини билдириб ўтди:

«Албатта, қуръа олдидан ҳаммамиз бироз ҳаяжондамиз. Бизга қайси жамоалар рақиб бўлишини кутяпмиз. Ҳозирча гуруҳимизга кимлар тушишини айтиш қийин. Умид қиламанки, қуръа натижалари биз учун ҳам, бутун Ўзбекистон мухлислари учун ҳам қулай бўлади», деди у.

Эслатиб ўтамиз, Ўзбекистон миллий терма жамоаси қуръада 3-саватчадан ўрин олган. Маросим тафсилотларига оид хабарлар ЎФА расмий саҳифаларида тақдим этиб борилади. Тадбирни Futbol TV телеканали жонли эфирда намойиш этади.