Bugun, 5-dekabr kuni oʻz tarixida ilk bor Jahon chempionati yoʻllanmasini qoʻlga kiritgan Oʻzbekiston terma jamoasi mundial guruh bosqichidagi raqiblarini bilib oladi. Toshkent vaqti bilan soat 22:00 da AQSh poytaxti Vashingtonda joylashgan “The Kennedy Center” majmuasida 2026-yilgi FIFA Jahon chempionatiga qurʼa tashlash marosimi start oladi.

Mazkur ahamiyatli tadbirda ishtirok etish uchun Oʻzbekiston Respublikasi Sport vazirligi, MOQ va OʻFA rahbariyati, Oʻzbekiston milliy terma jamoasi bosh murabbiyi Fabio Kannavaro, mutaxassislar hamda FIFA tomonidan maxsus taklif etilgan oʻzbek futboli afsonasi Mirjalol Qosimov AQShga yetib borgan.

Milliy jamoa ustozi Fabio Kannavaro qurʼadan oldin oʻz fikrlarini bildirib oʻtdi:

“Albatta, qurʼa oldidan hammamiz biroz hayajondamiz. Bizga qaysi jamoalar raqib boʻlishini kutyapmiz. Hozircha guruhimizga kimlar tushishini aytish qiyin. Umid qilamanki, qurʼa natijalari biz uchun ham, butun Oʻzbekiston muxlislari uchun ham qulay boʻladi”, dedi u.

Eslatib oʻtamiz, Oʻzbekiston milliy terma jamoasi qurʼada 3-savatchadan oʻrin olgan. Marosim tafsilotlariga oid xabarlar OʻFA rasmiy sahifalarida taqdim etib boriladi. Tadbirni Futbol TV telekanali jonli efirda namoyish etadi.