Франция пойтахтида ўтказилаётган ёзги Олимпиада ўйинларида ўзбек спортчилари ўз юришларини давом эттирмоқда.

Олимпиаданинг 14-куни, 8 август ва 9 августнинг илк соатларида юртдошларимизни муҳим баҳслар кутиб турибди. Бугун 6 нафар вакилимиз 4 та спорт тури бўйича Париж майдонларига кўтарилади.

«Токио-2020» ғолиби Улуғбек Рашитов таеквондо бўйича Ўзбекистон делегациясининг юришларини бошлаб беради. Улуғбек -68 кг вазн тоифасида қатнашмоқда ва унинг чиқиши соат тахминан 12:21 ларга тўғри келади.

Каноэда эшкак эшиш бўйича яккалик баҳсларида қатнашаётган қизимиз Нилуфар Зокированинг чиқиши соат 13:30 дан кейинга режалаштирилган.

Соат 14:00 дан бошлаб эркин курашчиларимиз Жавраил Шапиев (-86 кг) ва Ғуломжон Абдуллаев (-57 кг) лар майдонга чиқишади. Шапиевга грузиялик Владимир Гамкрелидзе рақиблик қилса, Абдуллаев озорбайжонлик Алиаббас Рзазадени синовдан ўтказади.

Кунни боксчиларимиз якунлаб беради. Дастлаб, финал йўлланмаси учун байроқдоримиз Абдулмалик Ҳалаков соат 00:30 да Австралия вакили Чарли Сениор билан куч синашса, 01:34 да «Рио-2016» чемпиони Ҳасанбой Дўсматов мезбонлар вакили Биллал Беннама билан олтин учун рингга кўтарилади.

Аввалроқ, Абдулмалик Ҳалаковнинг вазн тоифасида ярим финалда қатнашган қирғизистонлик боксчига секундантлик қилган Акмал Ҳасанов «Чингиз Айтматов» медали билан мукофотланиши ҳақида хабар берилганди.