Fransiya poytaxtida oʻtkazilayotgan yozgi Olimpiada oʻyinlarida oʻzbek sportchilari oʻz yurishlarini davom ettirmoqda.

Olimpiadaning 14-kuni, 8-avgust va 9-avgustning ilk soatlarida yurtdoshlarimizni muhim bahslar kutib turibdi. Bugun 6 nafar vakilimiz 4 ta sport turi boʻyicha Parij maydonlariga koʻtariladi.

“Tokio-2020” gʻolibi Ulugʻbek Rashitov tayekvondo boʻyicha Oʻzbekiston delegatsiyasining yurishlarini boshlab beradi. Ulugʻbek -68 kg vazn toifasida qatnashmoqda va uning chiqishi soat taxminan 12:21 larga toʻgʻri keladi.

Kanoeda eshkak eshish boʻyicha yakkalik bahslarida qatnashayotgan qizimiz Nilufar Zokirovaning chiqishi soat 13:30 dan keyinga rejalashtirilgan.

Soat 14:00 dan boshlab erkin kurashchilarimiz Javrail Shapiyev (-86 kg) va Gʻulomjon Abdullayev (-57 kg) lar maydonga chiqishadi. Shapiyevga gruziyalik Vladimir Gamkrelidze raqiblik qilsa, Abdullayev ozorbayjonlik Aliabbas Rzazadeni sinovdan oʻtkazadi.

Kunni bokschilarimiz yakunlab beradi. Dastlab, final yoʻllanmasi uchun bayroqdorimiz Abdulmalik Halakov soat 00:30 da Avstraliya vakili Charli Senior bilan kuch sinashsa, 01:34 da “Rio-2016” chempioni Hasanboy Doʻsmatov mezbonlar vakili Billal Bennama bilan oltin uchun ringga koʻtariladi.

Avvalroq, Abdulmalik Halakovning vazn toifasida yarim finalda qatnashgan qirgʻizistonlik bokschiga sekundantlik qilgan Akmal Hasanov “Chingiz Aytmatov” medali bilan mukofotlanishi haqida xabar berilgandi.