Ижтимоий тармоқларда икки нафар фуқаро йўлнинг қатнов қисмида ўзаро жанжаллашаётганлиги акс этган видеотасвирлар кенг тарқалиб, турли муҳокамаларга сабаб бўлди. Ҳолат юзасидан Тошкент шаҳар ИИББ маълумот берди.

Маълум қилинишича, кеча, 6 январь куни тахминан соат 19:00 ларда 1986 йилда туғилган фуқаро А.А. ўзининг бошқарувчидаги «Nexia-3» русумли автомашинада Шайхонтоҳур тумани Ислом Каримов кўчасида ҳаракатланаётган вақтида BYD русумли автомашина ҳайдовчиси билан ўзаро йўл талашган.

Оқибатда BYD русумли автомашина ҳайдовчиси 1982 йилда туғилган фуқаро С.А. йўлнинг қатнов қисмида тўхтаб, фуқаро А.А. билан йўлнинг қатнов қисмида ўзаро уришиб, жамоат тартибини бузган.

Тошкент шаҳар Ички ишлар бош бошқармаси берган маълумотларга кўра, ушбу жанжал натижасида тан жароҳати олганлар аниқланмаган.

Ҳозирда мазкур ҳолат юзасидан Шайхонтоҳур тумани ИИО ФМБ томонидан Ўзбекистон Республикаси Маъмурий жавобгарлик тўғрисидаги кодекснинг 183-модда («Майда безорилик») билан маъмурий баённома расмийлаштирилган. Тўпланган ҳужжатлар қонуний чора кўришлик учун жиноят ишлари бўйича туман судига юборилган.