Фото: Ўзэнергоинспекция

Тошкент вилоятида учта АЁҚШда автобензин давлат стандарт талабларига мос келмаслиги ҳолати аниқланди. Бу ҳақда «Ўзэнергоинспекция» матбуот хизмати хабар берди.

Ҳолат инспекция томонидан нефть маҳсулотларини етказиб бериш ва уларни сотувга чиқариш юзасидан ўтказилган назорат тадбирларида аниқланган.

Хусусан, Оҳангарон туманида жойлашган «Д.» хусусий корхонасига қарашли АЁҚШ ўрганилганда 4 дона минг литрлик елим идишларда дизель ёнилғиси сақланаётгани ҳамда ностандарт елим идишларга дизель ёнилғиси қуйиш ҳолати аниқланган. Шунингдек, ушбу шохобчада сотилаётган автобензиндан намуна олиниб, лаборатория таҳлилларидан ўтказилганда АI-92 русумли автобензин давлат стандарт талабларига мос келмаслиги (сифатсиз) маълум бўлган.

Шу каби ҳолатлар Янгийўл туманида «С.Ф.Б.» МЧЖ ва Паркент туманида «П.» фермер хўжалигига қарашли АЁҚШларда ҳам аниқланган.

Қайд этилишича, мазкур ҳолатлар юзасидан қоидабузарликка йўл қўйган ушбу АЁҚШлар камчиликлар бартараф этилгунга қадар биржа савдоларида иштирок этиши вақтинча тўхтатилди.