Тошкент вилояти божхона бошқармаси 2025 йил давомида кўрсатилган божхона хизматларини таҳлил қилди. Таҳлилга кўра, ўтган йил давомида Тошкент вилояти божхона бошқармаси томонидан 17,3 триллион сўмлик божхона тўловлари ҳисобланган ва мазкур тўловларнинг 9,3 триллион сўми давлат бюджетига ўтказилган.

Шунингдек, тадбиркорларни қўллаб-қувватлаш мақсадида божхона тўловларидан 8 триллион сўм имтиёзлар берилди, 2,4 миллиард АҚШ долларидан ортиқ бўлган товарлар хорижий мамлакатлар бозорларига йўналтирилди.

— Божхона бошқармаси тизимидаги идораларда 2025 йил давомида 129,2 миллиард сўмлик товар-моддий бойликларнинг мамлакатга олиб кирилиши ва олиб чиқилишида қонун бузилиш ҳолатлари аниқланиб, қонун устуворлиги таъминланган, — дейди Тошкент вилояти божхона бошқармаси ахборот хизмати раҳбари Наргиза Зуҳурова.

Бундан ташқари, ўтган йил мобайнида 59 та ҳолатда жами 195,3 килограмм гиёҳвандлик воситаларининг ноқонуний айланмасига батамом чек қўйишга эришилганини ҳам қайд этиш керак.

Тошкент вилоятида 2026 йилда ҳам божхона хизматларини сифат жиҳатидан янги босқичга кўтариш кўзда тутилган.

Отабек ИСРОИЛОВ, «Халқ сўзи».