Оғирлиги бир триллион тоннадан ортиқ оғирликка эга А23а айсберги Жанубий океанда ҳаракатга келган. Олимлар «мегаберг»нинг майдони деярли тўрт минг квадрат километрни ташкил этишини тахмин қилган. Бу ҳақда «Daily Mail» хабар берди.

Олимлар сунъий йўлдошлар орқали айсбергнинг ҳаракатини кузатиб, у экотизимларга қандай таъсир кўрсатиши мумкинлигини мунтазам ўрганиб боришмоқда. А23а айсберги илк бор 1986 йилда Антарктидадаги Филхнер шелф музлигидан ажралиб чиқиб, кейинчалик Уэдделл денгизига тиқилиб қолиши оқибатида ўттиз йил давомида ҳаракатсиз ҳолатда бўлган.

«А23а яна ҳаракатни бошлаганини кўриш қувончли. У Антарктидадан ажралган бошқа йирик айсберглар йўналишида кетиш ёки кетмаслигини кузатиш қизиқ. Энг муҳим жиҳати унинг маҳаллий экотизимга қандай таъсир кўрсатишида», — дейди океанограф Эндрю Мейерс.

А23а сўнгги марта 2023 йил охирида ҳаракатга келгани сезилган. Ўшанда сунъий йўлдошлар айсбергнинг Антарктидадан чиқиб кетишга уринишини қайд этган. Олимлар айсберг ўзи ҳаракатланаётган ҳудудларга жиддий таъсир ўтказиши мумкин деб ҳисоблашмоқда.

«Биламизки, бундай улкан айсберглар ўзлари ўтаётган сувларни озуқавий моддалар билан бойитиб, кам маҳсулдор ҳудудларда гуллаб-яшнаётган экотизимларни яратиши мумкин. Уларнинг ўлчами ва келиб чиқиши бу жараёнга қандай таъсир кўрсатиши мумкинлигини аниқ билмаймиз», — деди бир йил олдин А23а га шахсан ташриф буюрган экспедиция аъзоси, биогеокимёгар Лора Тейлор.

Айсберг ҳозирда океан узра эркин сузиб кетмоқда. Тадқиқотчилар айсбергнинг экотизимга таъсирини ўрганиш мақсадида унинг олд, орқа ва ён томонларидан сув намуналарини олган.

Қайд этиш керакки, бу айсбергнинг майдони Тошкент шаҳрининг (334,8 квадрат километр) майдонидан деярли 12 баробар катта деганидир.