Аёллар ҳуқуқларини ҳимоя қилган ва мамлакат ҳукумати томонидан қамалган эронлик ҳуқуқ фаоли Наргис Муҳаммадий 2023 йил учун тинчлик бўйича Нобель мукофотини қўлга киритди.

Ўтган йилда ушбу йўналишдаги Нобель мукофоти Россиянинг “Мемориал” инсон ҳуқуқлари жамияти, Украина фуқаролик эркинликлари маркази ва Беларуснинг “Весна” инсон ҳуқуқлари маркази асосчиси Алес Беляскийга берилган эди.

Алфред Нобель васиятига кўра, тинчлик бўйича мукофот халқларни бирлаштириш ва фаол армиялар сонини камайтириш, шунингдек, тинчлик конгрессларини ўтказиш ва уларга эътиборни жалб қилишда энг катта муваффақиятга эришган ёки бошқалардан кўпроқ иш қилган шахсга берилади.

Мазкур йўналишда биринчи Нобель мукофотини 1901-йилда Халқаро Қизил Хоч қўмитаси асосчиси, швейцариялик тадбиркор ва жамоат арбоби Анри Дюнан ҳамда “Тинчлик ва эркинлик лигаси” пацифистик ташкилоти асосчиси, француз сиёсатчиси Фредерик Пасси қўлга киритганди.