2025 йил 3 июнь куни Сенат Раиси бошчилигида Коррупцияга қарши курашиш миллий кенгашининг сайёр мажлиси бўлиб ўтди. Унда мактаб ва мактабгача таълим тизимидаги коррупция ҳолатлари, уларнинг олдини олиш бўйича амалга оширилаётган ишлар ва мавжуд муаммолар атрофлича муҳокама қилинди. Мажлисда таъкидланганидек, асосий мақсад муаммоларни танқид қилиш эмас, балки уларни биргаликда ҳал қилишдан иборат.

Сенатнинг тегишли қўмиталари ва идоралар вакилларидан иборат ишчи гуруҳ Мактабгача ва мактаб таълими вазирлиги билан ҳамкорликда соҳага оид вазиятни ўрганиб чиқди. «Коррупциясиз соҳа» лойиҳаси доирасида бир қатор дастурлар қабул қилиниб, мактаб ва боғчаларга оид 79 та норматив-ҳуқуқий ҳужжат коррупцияга қарши экспертизадан ўтказилди. Бу ҳужжатлар таълим тизимидаги коррупция хавфини камайтириш ва тартибларни такомиллаштиришга хизмат қилмоқда.

Коррупцияни чеклаш мақсадида таълим соҳасида бир қанча давлат хизматлари рақамлаштирилди. Жумладан, болани боғчага жойлаштириш, 1-синфга қабул қилиш, педагогларни аттестациядан ўтказиш, лицензия олиш, ҳужжатларга апостил қўйиш каби хизматлар эндиликда электрон шаклда амалга оширилмоқда. Бу эса фуқаролар учун қулайликлар яратиш билан бирга, тизимдаги шаффофликни ҳам оширади.

Мажлис давомида айрим хизматлар учун талаб этиладиган ҳужжатлар сони қисқартирилгани, жараёнлар соддалаштирилгани алоҳида қайд этилди. Бу каби ёндашувлар таълим тизимида коррупция хавфини камайтиришга қаратилган ислоҳотларнинг амалий самараси сифатида баҳоланди. Бундай ёндашувлар орқали фуқароларнинг ишончини ошириш ва адолатли тизимни шакллантиришга эришилмоқда.

Ёшларда коррупцияга муросасизлик кайфиятини шакллантириш мақсадида мактаб ва мактабгача муассасаларда «Коррупцияга қарши курашиш» ўқув дастури ишлаб чиқилди. Бундан ташқари, GRACE дастури доирасида мактаб ва боғчаларда ҳалоллик тарбияси жорий этилиши режалаштирилган. Бу эса коррупцияга қарши иммунитетга эга янги авлодни вояга етказиш йўлида муҳим қадамлардан бири бўлмоқда.

Сенат Раиси Танзила Нарбаева «Ҳалоллик вакцинаси» билан эмланган авлодни тарбиялаш таълим тизими олдидаги устувор вазифалардан бири бўлиши кераклигини таъкидлади. Бу борада фақат ўқувчиларгина эмас, балки ўқитувчи ва тарбиячилар ҳам мунтазам равишда ўқитилиши ва малакаси оширилиши зарурлиги таъкидланди. Ўз навбатида, бу ҳолат ҳалоллик муҳитини шакллантиришда ҳал қилувчи омил саналади.

Мажлис якунида таълим тизимида коррупцияга қарши курашиш чоралари бўйича бир қатор топшириқлар берилди. Жумладан, ишга қабул қилиш жараёнларини тўлиқ рақамлаштириш, давлат харидларини шаффофлаштириш, ички назорат механизмларини кучайтириш ҳамда фуқароларнинг ишончини мустаҳкамлаш юзасидан чора-тадбирлар белгилаб олинди.