2025-yil 3-iyun kuni Senat Raisi boshchiligida Korrupsiyaga qarshi kurashish milliy kengashining sayyor majlisi boʻlib oʻtdi. Unda maktab va maktabgacha taʼlim tizimidagi korrupsiya holatlari, ularning oldini olish boʻyicha amalga oshirilayotgan ishlar va mavjud muammolar atroflicha muhokama qilindi. Majlisda taʼkidlanganidek, asosiy maqsad muammolarni tanqid qilish emas, balki ularni birgalikda hal qilishdan iborat.

Senatning tegishli qoʻmitalari va idoralar vakillaridan iborat ishchi guruh Maktabgacha va maktab taʼlimi vazirligi bilan hamkorlikda sohaga oid vaziyatni oʻrganib chiqdi. “Korrupsiyasiz soha” loyihasi doirasida bir qator dasturlar qabul qilinib, maktab va bogʻchalarga oid 79 ta normativ-huquqiy hujjat korrupsiyaga qarshi ekspertizadan oʻtkazildi. Bu hujjatlar taʼlim tizimidagi korrupsiya xavfini kamaytirish va tartiblarni takomillashtirishga xizmat qilmoqda.

Korrupsiyani cheklash maqsadida taʼlim sohasida bir qancha davlat xizmatlari raqamlashtirildi. Jumladan, bolani bogʻchaga joylashtirish, 1-sinfga qabul qilish, pedagoglarni attestatsiyadan oʻtkazish, litsenziya olish, hujjatlarga apostil qoʻyish kabi xizmatlar endilikda elektron shaklda amalga oshirilmoqda. Bu esa fuqarolar uchun qulayliklar yaratish bilan birga, tizimdagi shaffoflikni ham oshiradi.

Majlis davomida ayrim xizmatlar uchun talab etiladigan hujjatlar soni qisqartirilgani, jarayonlar soddalashtirilgani alohida qayd etildi. Bu kabi yondashuvlar taʼlim tizimida korrupsiya xavfini kamaytirishga qaratilgan islohotlarning amaliy samarasi sifatida baholandi. Bunday yondashuvlar orqali fuqarolarning ishonchini oshirish va adolatli tizimni shakllantirishga erishilmoqda.

Yoshlarda korrupsiyaga murosasizlik kayfiyatini shakllantirish maqsadida maktab va maktabgacha muassasalarda “Korrupsiyaga qarshi kurashish” oʻquv dasturi ishlab chiqildi. Bundan tashqari, GRACE dasturi doirasida maktab va bogʻchalarda halollik tarbiyasi joriy etilishi rejalashtirilgan. Bu esa korrupsiyaga qarshi immunitetga ega yangi avlodni voyaga yetkazish yoʻlida muhim qadamlardan biri boʻlmoqda.

Senat Raisi Tanzila Narbayeva “Halollik vaksinasi” bilan emlangan avlodni tarbiyalash taʼlim tizimi oldidagi ustuvor vazifalardan biri boʻlishi kerakligini taʼkidladi. Bu borada faqat oʻquvchilargina emas, balki oʻqituvchi va tarbiyachilar ham muntazam ravishda oʻqitilishi va malakasi oshirilishi zarurligi taʼkidlandi. Oʻz navbatida, bu holat halollik muhitini shakllantirishda hal qiluvchi omil sanaladi.

Majlis yakunida taʼlim tizimida korrupsiyaga qarshi kurashish choralari boʻyicha bir qator topshiriqlar berildi. Jumladan, ishga qabul qilish jarayonlarini toʻliq raqamlashtirish, davlat xaridlarini shaffoflashtirish, ichki nazorat mexanizmlarini kuchaytirish hamda fuqarolarning ishonchini mustahkamlash yuzasidan chora-tadbirlar belgilab olindi.