“Samarqand Oʼzbekgazsuv qurilish” МЧЖ ва Тойлоқ туман йўллардан фойдаланиш унитар корхонаси ўртасида бир қатор шартномалар тузилган. Тузилган шартномаларга асосан, тадбиркор буюртмачи корхонага келишилган хизматларни кўрсатган. Уларнинг жами қиймати 11 299 784 247,7 сўмни ташкил этган. Аммо шартномалар шартлари бажарилган бўлсада, корхона хизмат ҳақини 7 346 747 032,8 сўм қисмини тўлаб, қолганини тўлашни пайсалга солиб келган. Шартнома шартларига кўра тўлов кечиктирилган ҳар бир кун учун мажбуриятлар бажарилмаган қисмининг 0,5 фоизи, бироқ 30 фоизидан ортиқ бўлмаган миқдорда пеня тўлаш назарда тутилган.

Шунга кўра, МЧЖ томонидан жорий йил 17 февраль куни Тойлоқ туман йўллардан фойдаланиш унитар корхонасига корхонанинг жамият олдидаги қарздорлигини тўлаб бериш, акс ҳолда асосий қарз билан бирга пеня ундириш масаласида судга мурожаат қилиниши ҳақида талабнома, кейинчалик бир неча бор огоҳлантириш юборилган. Бироқ корхона масъуллари шунда ҳам ишим битди, эшагим сувдан ўтди қабилида иш тутиб келган.

МЧЖ раҳбарияти бузилган ҳуқуқларини тиклаш, кўрсатган хизматлари учун иш ҳақини ундиришда ёрдам сўраб Тойлоқ туман адлия бўлимига мурожаат қилди ва ўрганишлар давомида корхона чиндан ҳам шартнома шартларини тўлиқ бажармагани тасдиқланди. Адлия бўлими тадбиркор манфаатида Тойлоқ туманлараро иқтисодий судига даъво аризаси киритди.

Суд ишни ҳар томонлама кўриб чиқиб, Ўзбекистон Республикаси Иқтисодий процессуал кодексининг 118, 176-179, 180, 186-моддаларини қўллаб корхона ҳисобидан тадбиркор фойдасига 3 693 037 214,92 сўм асосий қарз ва 105 029 250 сўм пеня ундириш мажбуриятини юклади.