Франция пойтахтида ўтказилаётган ёзги Олимпиада ўйинларида ўзбек спортчилари ўз иштирокларини давом эттирмоқда.

Таэквондо WT бўйича +67 кг вазн тоифасида беллашувларда қатнашган Ўзбекистон терма жамоаси аъзоси Светлана Осипова фаолиятидаги иккинчи Олимпиадасида биринчи финалини ўтказди.

Ҳамюртимиз олтин медаль учун курашда мезбонлар вакиласи Альтея Лоренга қарши беллашди. Муросасиз кечган баҳснинг биринчи раундида 0:3 ҳисобида ютқазиб қўйган бўлса, иккинчисида 3:3 ҳисоби қайд этилди. Аммо баҳсдаги фаоллик ҳисобига ғалаба мезбон спортчига берилди.

Қайд этиш керакки, ҳамюртимиз “Париж-2024”да ўз иштирокини 1/8 финал босқичидан бошлади. Ушбу босқичда у Кот-д’ Ивуар вакиласи Астан Батилини 2:1 ҳисобида енгди. Чорак финалда XXXIII ёзги Олимпидада учинчи рақамда сараланган Буюк Британия вакили Ребекка Макгоуэндан 2:0 ҳисобида устун келди. Ярим финалда турнирда иккинчи рақамда сараланган Жанубий Корея таэквондочиси Дабин Лини 2:0 ҳисобида мағлуб этди.

Светлана Осипова 2000 йил 3 май куни таваллуд Тошкент шаҳрида туғилган. Ҳамюртимиз 2017 йилда Жанг санъати ва ёпиқ иншоотлардаги Осиё ўйинларида кумуш медални қўлга киритган. 2018 ва 2022 йилларда ўтказилган ёзги Осиё ўйинларида бронза медалларига сазовор бўлган.

Бундан ташқари, Светлананинг ҳисобида 2019 йилда ташкил этилган Бутунжаҳон армия ўйинларининг, 2021 йилда ташкил этилган Ислом бирдамлик ўйинларининг, 2022 йил бўлиб ўтган жаҳон чемпионатининг олтин медаллари бор. Ўтган йил ўтказилган жаҳон чемпионатида эса у кумуш медални қўлга киритган.

Аввалроқ, «Токио-2020» ғолиби Акбар Жўраев «Париж-2024»да кумуш медалига эга чиққанди.