Сунъий интеллект орқали шахсга доир маълумотларга ноқонуний ишлов бериш ва уларни ОАВ ёки Интернетда тарқатиш учун жавобгарлик белгиланиши режалаштирилмоқда. Бу ҳақида Олий Мажлис Қонунчилик палатаси маълум қилди.

Унга кўра, бир гуруҳ депутатлар томонидан қонунчилик ташаббуси ҳуқуқи асосида ишлаб чиқилган — сунъий интеллектни қўллаш орқали юзага келадиган муносабатларни тартибга солишга қаратилган қонун лойиҳаси биринчи ўқишда концептуал жиҳатдан муҳокама қилинган.

Муҳокамалар давомида, депутатлар Маъмурий жавобгарлик тўғрисидаги кодексга ўзгартириш киритишни кўриб чиқишган. Лойиҳада сунъий интеллект технологияларидан фойдаланган ҳолда яратилган ахборот ресурсларига маркировка қўйиш талаби назарда тутилган.

Шунингдек, сунъий интеллектдан фойдаланиб яратилган ахборот ресурслари ва сунъий интеллект технологиялари асосида ишлайдиган ахборот тизимлари инсон, унинг ҳаёти, соғлиғи, эркинлиги, шаъни, қадр-қиммати ва бошқа ажралмас ҳуқуқларини бузмаслигига оид талабни киритиш кўзда тутилмоқда.

«Миллий тикланиш» демократик партияси раҳбари Алишер Қодировнинг таъкидлашича, сунъий интеллектдан фойдаланиб, шахсга доир маълумотларга ноқонуний ишлов берган ва тарқатганларнинг иш қуроллари мусодара қилинади, ўн беш суткагача маъмурий қамоққа олинади ёки базавий ҳисоблаш миқдорининг эллик бараваридан юз бараваргача жаримага тортилади.