РИА Новостининг хабар беришича, Суданнинг Эл-Фашер шаҳрида Тезкор жавоб кучлари (SBR) исёнчилари назоратни қўлга киритгач, 2 мингдан ортиқ тинч аҳоли ҳалок бўлган. Бу ҳақда минтақавий ҳукумат вакили Агад бен Кони маълум қилган.

«Ҳалок бўлганлар сони 2 227 кишига етди, уларнинг орасида аёллар, болалар ва кексалар ҳам бор. Барчаси кўрди — жангарилар Саудий касалхонасида, қочқинлар учун вақтинчалик бошпаналарда ва масжидларда ярадорларни, беморларни ҳамда ўқ-дорилардан паноҳ излаган одамларни отиб ташлашди», — деди у.

Маълумотларга кўра, сўнгги кунларда Эл-Фашерни 393 мингдан ортиқ киши тарк этган. Улардан 30 мингга яқини Корма, Тавила ва бошқа шаҳарлардаги қочқинлар лагерларига етиб борган — бу жойлар Эл-Фашердан ўнлаб километр узоқликда жойлашган.

Якшанба куни Тезкор жавоб кучлари (SBR) Эл-Фашердаги 6-пиёда дивизияси штабини эгаллаганини эълон қилди. Бу дивизия Дарфурдаги ҳукумат қўшинларининг сўнгги таянч нуқтаси эди.

Эслатиб ўтамиз, 2023 йил 15 апрелдан бери Суданда генерал Муҳаммад Ҳамдан Дағло бошчилигидаги «SBR» кучлари ва мунтазам армия ўртасида қаттиқ жанглар давом этмоқда.