RIA Novostining xabar berishicha, Sudanning El-Fasher shahrida Tezkor javob kuchlari (SBR) isyonchilari nazoratni qoʻlga kiritgach, 2 mingdan ortiq tinch aholi halok boʻlgan. Bu haqda mintaqaviy hukumat vakili Agad ben Koni maʼlum qilgan.

“Halok boʻlganlar soni 2 227 kishiga yetdi, ularning orasida ayollar, bolalar va keksalar ham bor. Barchasi koʻrdi — jangarilar Saudiy kasalxonasida, qochqinlar uchun vaqtinchalik boshpanalarda va masjidlarda yaradorlarni, bemorlarni hamda oʻq-dorilardan panoh izlagan odamlarni otib tashlashdi”, — dedi u.

Maʼlumotlarga koʻra, soʻnggi kunlarda El-Fasherni 393 mingdan ortiq kishi tark etgan. Ulardan 30 mingga yaqini Korma, Tavila va boshqa shaharlardagi qochqinlar lagerlariga yetib borgan — bu joylar El-Fasherdan oʻnlab kilometr uzoqlikda joylashgan.

Yakshanba kuni Tezkor javob kuchlari (SBR) El-Fasherdagi 6-piyoda diviziyasi shtabini egallaganini eʼlon qildi. Bu diviziya Darfurdagi hukumat qoʻshinlarining soʻnggi tayanch nuqtasi edi.

Eslatib oʻtamiz, 2023-yil 15-apreldan beri Sudanda general Muhammad Hamdan Dagʻlo boshchiligidagi “SBR” kuchlari va muntazam armiya oʻrtasida qattiq janglar davom etmoqda.