Депутатлик фаолияти шунчаки овоз беришдан иборат эмас. У сессияларда ўз фикри, ташаббуси ва таклифлари билан фаол иштирок этиши, доимий комиссияларда ишлаши лозим. Ўзбекистон халқ шоири Эркин Воҳидовнинг “Сизни халқ сайлади, қилмади – суюк, балки елкангизга – юк ортди буюк” сатрлари ҳам ҳар бир депутатнинг зиммасидаги улуғ ва шарафли масъулиятни ёрқин кўрсатади.

Сирдарё вилояти Кенгашига сайланган ҳар бир депутатнинг ортида тахминан 12-15 минг сайловчи турибди, чунки вилоятда ярим миллионга яқин сайловчи бор. Бу эса ҳар биримизнинг зиммамизга катта масъулият юклайди. Агар бу залворли юкни доимо ҳис этсак, сайловчилар ишончини тўла-тўкис оқлаймиз. Вилоят депутатлари ўз фаолиятлари самарадорлиги юқори бўлишининг бош мезони сайловчилар билан тўғридан тўғри ва мунтазам мулоқотда бўлиб туришда деб билмоқда. Бунда сайловчилар, “маҳалла еттилиги” билан учрашиш, муаммоларни жойида ўрганиш ва ҳал қилиш, тегишли ташкилот ва идораларга депутат сўровлари тақдим қилишга алоҳида эътибор қаратмоқда. Хусусан, жорий йилнинг январь-октябрь ойларида халқ депутатлари вилоят Кенгашининг 16 та сессияси ўтказилди. Уларда депутатлар томонидан масъул раҳбарларга қўшимча равишда 18 та таклиф ва мулоҳаза билдирилди. Йилнинг шу даврида тегишли идораларга 131 та депутатлик сўрови юборилди. Ҳозирча мазкур масалаларнинг 55 таси ҳал этилди. Қолган 33 та муаммо ижроси келгуси дастурларга киритилди. Эътиборлиси, бугунги кунда депутатлар томонидан ўрганилган муаммоларни “Ҳокимлик соати” орқали ҳал қилиш тизими ҳам қўлланилмоқда.

Депутатлик сўровларида 17 та таълим муассасалари, 34 та йўллар ва ички кўчалар таъмири, 9 ичимлик суви, 16 таси электр таъминотини яхшилаш, симёғочларни алмаштириш, 13 таси ирригация тизимлар, 3 та суюлтирилган газ баллонларини ўз вақтида етказиб бериш ҳамда 39 бошқа йўналишлар билан боғлиқ масалалар кўтарилди. Депутат Азизбек Рахмоновнинг – Ховос туманининг Ҳуснобод, Бинокор маҳаллаларидан ўтувчи 10 км масофадаги автомобиль йўлини таъмирлаш тўғрисидаги сўрови ижобий ҳал бўлди. Депутат Гулноза Аббасова эса Мирзаобод тумани Т.Ахмедов маҳалласига суюлтирилган газ баллонларни ўз вақтида олиб келиш бўйича тақдим қилган сўровидан сўнг бу борадаги муаммолар тўлиқ бартараф этилди. Депутат Шерали Мамадецоев томонидан тақдим қилинган депутатлик сўровига асосан Ховос тумани “Оқчангал” МФЙ ҳудудидаги 8-умумтаълим мактаби ўқувчилари автомагистрал йўлни хавфсиз кесиб ўтишлари учун зарурий йўл белгилари ўрнатилди. Сардоба тумани “Янгиқишлоқ” МФЙ ҳудуди туман марказидан четда бўлганлиги ва банкомат мавжуд эмаслиги боис фуқароларда нақд пул билан боғлиқ муаммолар юзага келганди. Депутат Рустам Турсунмурадовнинг ташаббуси билан мазкур маҳаллага Марказий банк бошқармаси томонидан банкомат ўрнатиб берилди. Депутат Олия Турдиева эса Гулистон туманидаги Бешбулоқ маҳалласи ҳудудидаги Арчазор, Соҳибкор ва Бахмал кўчалари бўйидаги зовурларни тозалаш тўғрисида Қуйи Сирдарё ирригация тизимлари ҳавза бошқармасига депутатлик сўрови жўнатди. Натижада 2,2 км узунликдаги коллекторда таъмирлаш-тозалаш ишлари бажарилди.

Маълумки, Олий Мажлис Сенати Кенгашининг жорий йил 14 январда қабул қилинган “Ҳудудларни ривожлантириш ҳамда аҳоли муаммоларини ҳал этишда маҳаллий Кенгашлар депутатлари ва сенаторларнинг “маҳалла еттилиги” билан ўзаро ҳамкорлигини янада кучайтириш чора-тадбирлари тўғрисида”ги қарорига асосан депутатлар чоракда камида бир марта ўзлари сайланган округдаги маҳаллаларда “еттилик” ва сайловчилар билан учрашувлар ўтказиши лозим. Айни вазифа ижроси бўйича таҳлиллар масалаларни жойида ўрганиш ва ҳал қилиш механизми депутатлар фаолияти самарадорлиги юқори бўлишининг бош омили ҳисобланади.

Бугунги кунда сўнгги 8-9 йилдаги улкан ўзгаришларни ва “Янги Ўзбекистон” ғоясининг энг устувор йўналишларини эътироф этмоқчи бўлсак, албатта аввало, “инсон қадри-улуғ”, “халқчил давлат”, “очиқлик”, “маҳаллабай ишлаш”, “халқ давлат идораларига эмас, давлат идоралари халққа хизмат қилиши керак”, деган тушунча-тамойиллар кўз ўнгимизга келади. Зеро, бу иборалар бугунги кунда аллақачон ҳаётий ҳақиқатга, жамият ва халқ ҳаётида кундалик воқелик, раҳбарлару оддий ходимлар, албатта, депутатлар фаолиятининг доимий ҳамда асосий вазифасига айланган. Уларнинг ҳар бири қонуний-меъёрий ҳужжатлар билан мустаҳкамланган. Муҳими, бу эзгу ҳаракатларнинг бари Президентимизнинг 2023 йил 11 сентябрда қабул қилинган “Ўзбекистон-2030 стратегияси тўғрисида”ги қарорида келгуси 7 йил учун белгилаб қўйилган 100 та мақсаднинг 75-мақсади, яъни “Маҳаллий давлат ҳокимияти вакиллик органларини – халқнинг чинакам овозига айлантириш” вазифасини амалга оширишга хизмат қилади.  

Покиза АХМЕДЖОНОВА,

Халқ депутатлари Сирдарё вилояти Кенгаши раиси, сенатор.