Аҳмадали ШEРНАЗАРОВ/«Халқ сўзи». Сирдарё вилоятида Венгриянинг «ZA-Invest Poultry» компанияси билан ҳамкорликда амалга оширилаётган лойиҳа доирасида кластернинг 130 гектар майдонида 8 та паррандачилик фабрикаси, инкубатор, кушхона ва қайта ишлаш цехлари, озуқа ишлаб чиқариш корхонаси, музлаткич ва маъмурий бинолар қурилади. Лойиҳа тўлиқ амалга оширилгач йилига 16 миллион дона бройлер товуқ етказиб берилади ва 120 минг тонна омухта ем ишлаб чиқарилади.

Ушбу йирик лойиҳани «OTP Green Fund» молиялаштирилади ва «OTP Group» таркибига кирувчи «ZA-Invest Poultry» компанияси томонидан амалга оширилади.

Ўзбекистон Республикаси Инвестициялар, саноат ва савдо вазирлиги ташкилотчилигида Венгриянинг «OTP Group» концерни делегацияси билан бўлиб ўтган учрашувда гуруҳ таркибига кирувчи компания билан айни масала, яъни Сирдарё вилоятида паррандачилик кластерини ташкил этиш бўйича йирик лойиҳани амалга ошириш борасидаги навбатдаги чоралар конструктив тарзда муҳокама қилинди ҳамда инвестиция битими, ер участкасини ижарага бериш, таъсис ва низом шартномалари имзоланди.