Айни кунларда ташаббускор ва фаол аёллардан иборат Сирдарё вилояти делегацияси Хитой Халқ Республикасида хизмат сафари билан бўлиб турибди.

Сафар доирасида улар Ўзбекистоннинг Хитойдаги элчихонаси ва Сирдарё вилояти ҳокимлиги ҳамкорлигида ташкил этилган ўқув курсида иштирок этмоқда. Ушбу курс Хитойнинг Шенси провинциясида аёллар тадбиркорлигини ривожлантириш бўйича илғор тажрибани ўрганишга қаратилган.

Хизмат сафари дастурида провинция раҳбарияти билан учрашувлар, кичик ва ўрта бизнес корхоналари фаолияти билан танишиш, шунингдек, аёл тадбиркорлар уюшмалари билан тажриба алмашиш ўрин олган. Бундан ташқари, мактабгача ва мактаб таълими соҳасидаги замонавий амалиётлар билан ҳам танишилмоқда.

Маълумот учун: Шенси провинсияси Хитойнинг саноати ривожланган ҳудудларидан бири бўлиб, иқтисодий тараққиёт ҳамда камбағалликни қисқартириш дастурларини амалга ошириш борасида салмоқли тажрибага эга. Делегация мазкур провинциядаги сочиқ, чойшаб, ётоқ буюмлари каби маҳсулотлар ишлаб чиқаришга ихтисослашган, асосий мижозлари нуфузли меҳмонхоналардан иборат бўлган “Shaanxi Yalan Group” тўқимачилик фабрикаси фаолияти билан танишди. Шунингдек, “Shaanxi Lyutsindju Food Sayens and Technology” сояни қайта ишлаш заводидаги иш жараёнлари, замонавий технологиялар, тадбиркорлик тажрибалари ўрганилди.

Аҳмадали ШЕРНАЗАРОВ, “Халқ сўзи”.