Қарши давлат техника университетида Олий Мажлис Сенати аъзоси Шуҳрат Аслановнинг талабалар билан очиқ мулоқоти ташкил этилди.

Тадбирда сенатор мамлакатимизда амалга оширилаётган янгиланиш ва ислоҳотлар жараёнида ёшларнинг ўрни, билими, фуқаролик масъулияти ва малакасини оширишга қаратилган давлат сиёсати ҳақида батафсил маълумот берди.

Шу билан бирга, ёшларни ҳар томонлама қўллаб-қувватлаш, уларнинг билимли ва малакали кадр сифатида шаклланиши учун кенг имкониятларга эътибор қаратди.

Мулоқот давомида талабаларнинг назарий ва амалий билимларини уйғунлаштириш, мутахассис кадрлар тайёрлаш тизимини такомиллаштириш, ёшларнинг сиёсий-ҳуқуқий саводхонлигини ошириш, уларнинг жамият ҳаётида фаол иштирокини таъминлаш масалалари юзасидан фикр алмашилди.

Шунингдек, «Шўртан газ кимё» мажмуаси билан университет ўртасидаги ўзаро ҳамкорлик, Илғор муҳандислик мактаби фаолияти, талабаларнинг амалий кўникмаларини шакллантириш, хорижий тилларни ўрганиш ва чет элда меҳнат фаолиятини давом эттириш учун шароитлар яратилганига ҳам урғу берилди.

Тадбир якунида «Шўртан газ кимё мажмуаси» МЧЖнинг стипендия дастури ғолибларига сертификатлар ва эсдалик совғалари топширилди.