Мис дунё бозорида нафақат саноат метали, балки мамлакатнинг иқтисодий қудратини ҳам белгиловчи стратегик ресурс сифатида қадрланади. 2026 йилга келиб, бу жараёнда янада жадаллашмоқда. Жорий йилнинг дастлабки ойидаёқ Лондон металл биржасида ҳар бир тонна мис 12,5–13 минг АҚШ долларига баҳоланмоқда. Бу ўтган даврга нисбатан 40 фоиз ўсиш деганидир.

Жаҳон бозорида 150 минг тоннадан 330 минг тоннагача бўлган миқдорда тозаланган мис танқислиги шароити кузатилаётган айни кунларда юртимизда тоғ-кон саноатини ривожлантириш ҳамда ишлаб чиқариш қувватини янада кенгайтириш кун тартибидаги масалаларнинг бирига айланган. Айни шу мақсадда “Олмалиқ кон-металлургия комбинати” акциядорлик жамиятида ишлаб чиқариш ҳажмини оширишга қаратилган навбатдаги йирик инвестиция лойиҳаси бошланди.

Комбинатнинг 2-мис бойитиш фабрикасида маъданларни қайта ишлаш қувватини йилига 5 миллион тоннагача ошириш мақсадида янги бойитиш мажмуаси қурилмоқда. 3,1 гектар ҳудудда амалга оширилаётган бунёдкорлик ишлари “Олмалиқметаллургқурилиш” трести томонидан олиб борилмоқда. Мазкур лойиҳа доирасида Марказий таъмирлаш механика заводида ҳам тайёрланган замонавий технологик ускуналар ўрнатилиб, маъданларни майдалаш, янчиш, флотация ва қуюлтириш каби мураккаб технологик жараёнлар тўлиқ маҳаллийлаштириш асосида йўлга қўйилади.

“Ёшлик – I” кони маъданини қайта ишлашга ихтисослашган ушбу янги мажмуа ишга тушгач, бир йилда 74,2 минг тонна қўшимча концентрат олишга эришилади. Бу эса ўз навбатида мис катоди билан бир қаторда олтин ва кумуш каби қимматбаҳо металлар ишлаб чиқариш ҳажмининг ҳам сезиларли даражада ошишини таъминлайди. Шу билан бирга, лойиҳа тўлиқ ишга туширилганидан сўнг, 600 та янги иш ўрни яратилади. Қолаверса, бюджетга тўловлар миқдори кўпаяди ва 2-мис бойитиш фабрикасининг умумий ишлаб чиқариш қуввати 10 миллион тоннага етказиш имкони яратилади.

Отабек ИСРОИЛОВ, “Халқ сўзи”.