Абдулазиз Йўлдошев/«Халқ сўзи». Нон, нон маҳсулотларини ишлаб чиқариш учун ишлатиладиган кузги юмшоқ буғдойга талаб юқори. Бундай рақобатбардош навни яратиш учун кўплаб омилларни ҳисобга олиш керак. Нафақат доннинг ҳосилдорлиги, балки униб чиқиши, жойлашиши, касалликларга чидамлилиги ҳам муҳим ўрин тутади. Самарқанд агроинновациялар ва тадқиқотлар институти ҳамда «Фарбома селект» илмий уруғчилик фермер хўжалиги ҳамкорлигида кузги буғдойнинг ҳосилдорлиги ва сифат кўрсаткичлари юқори бўлган, ташқи муҳитнинг абиотик ва биотик омилларига чидамли янги нави яратилди.

— Кейинги йилларда 15-20 минг гектар майдонларимизда кузги юмшоқ буғдойнинг интенсив типдаги «Жасмина» ва «Фарбома» навлари экилмоқда, — дейди Агроинновациялар ва тадқиқотлар институти профессори Ғулом Ғайбуллаев. — Илмий изланишлар давомида интенсив типдаги юмшоқ буғдойнинг «Самарқанд», «Ўзбекистон 30», арпанинг «Бек» навига асос солиб, қишлоқ хўжалиги экинлари навларини синаш марказига юбордик. Сифатли янги буғдойнинг «Самарқанд» нави Давлат реестрига истиқболли нав сифатида киритилди. Мазкур янги навнинг бирламчи уруғчилиги йўлга қўйилди. Келгусида ушбу нав 10-15 минг гектар майдонларга экилиши кутилмоқда.

Самарқанд агроинновациялар ва тадқиқотлар институти миллий марказлар билан биргаликда, ғаллачиликда илғор Германия, Жанубий Корея, Россия Федерацияси билан ҳамкорликда илмий изланишлар олиб бормоқда.