Самарқанд шаҳрида Дин ишлари бўйича қўмита, Ўзбекистон мусулмонлари идораси, Ўзбекистон халқаро ислом академияси, Имом Бухорий халқаро илмий-тадқиқот маркази ҳамда бошқа манфаатдор вазирлик ва идоралар билан ҳамкорликда «Имом Бухорий меросининг ўзига хос хусусиятлари ва бугунги кундаги тарбиявий аҳамияти» мавзусида халқаро анжуман ўтказилмоқда.

Шаҳардаги ёшлар марказида бўлиб ўтаётган мазкур конференцияда Афғонистон Ислом Республикаси Иршод, ҳаж ва вақф ишлари вазири, Тожикистон Ислом маркази раиси бошчилигидаги делегация ҳамда Ўзбекистондан 50 га яқин таниқли уламолар, етук олимлар, нуфузли университетлар, илмий-тадқиқот марказлари вакиллари иштирок этмоқда.

Анжуман давомида «Имом Бухорий меросининг ўзига хос хусусиятлари ва афзалликлари», «Имом Бухорий меросининг бугунги кундаги аҳамияти ва миллатлараро тотувликни таъминлашдаги ўрни», «Марказий Осиё давлатларида миллатлараро тотувлик ва диний бағрикенглик, яхши қўшничилик ва ҳамжиҳатлик, диний-миллий қадриятларни асраб-авайлаш» мавзуларида маърузалар тингланади. Халқаро конференцияда шунингдек, Ўзбекистонда сўнгги йилларда диний-маърифий соҳада амалга оширилаётган ижобий янгиланишлар ва ўзгаришларни халқаро миқёсда тарғиб қилиш мақсад қилинган.

Абдулазиз Йўлдошев,

«Халқ сўзи»