Samarqand shahrida Din ishlari boʻyicha qoʻmita, Oʻzbekiston musulmonlari idorasi, Oʻzbekiston xalqaro islom akademiyasi, Imom Buxoriy xalqaro ilmiy-tadqiqot markazi hamda boshqa manfaatdor vazirlik va idoralar bilan hamkorlikda “Imom Buxoriy merosining oʻziga xos xususiyatlari va bugungi kundagi tarbiyaviy ahamiyati” mavzusida xalqaro anjuman oʻtkazilmoqda.

Shahardagi yoshlar markazida boʻlib oʻtayotgan mazkur konferensiyada Afgʻoniston Islom Respublikasi Irshod, haj va vaqf ishlari vaziri, Tojikiston Islom markazi raisi boshchiligidagi delegatsiya hamda Oʻzbekistondan 50 ga yaqin taniqli ulamolar, yetuk olimlar, nufuzli universitetlar, ilmiy-tadqiqot markazlari vakillari ishtirok etmoqda.

Anjuman davomida “Imom Buxoriy merosining oʻziga xos xususiyatlari va afzalliklari”, “Imom Buxoriy merosining bugungi kundagi ahamiyati va millatlararo totuvlikni taʼminlashdagi oʻrni”, “Markaziy Osiyo davlatlarida millatlararo totuvlik va diniy bagʻrikenglik, yaxshi qoʻshnichilik va hamjihatlik, diniy-milliy qadriyatlarni asrab-avaylash” mavzularida maʼruzalar tinglanadi. Xalqaro konferensiyada shuningdek, Oʻzbekistonda soʻnggi yillarda diniy-maʼrifiy sohada amalga oshirilayotgan ijobiy yangilanishlar va oʻzgarishlarni xalqaro miqyosda targʻib qilish maqsad qilingan.

Abdulaziz Yoʻldoshev,

“Xalq soʻzi”