Абдулазиз ЙЎЛДОШЕВ/«Халқ сўзи». Жорий йилнинг 1-3 август кунлари илк бор “Самарқанд оши” халқаро фестивали ўтказилмоқда. Унда кўплаб таниқли ошпазлар қатнашяпти. Тадбир кечаётган жараённи дунёнинг қатор мамлакатларидан келган сайёҳлар, 14 та давлат оммавий ахборот воситаларининг 50 нафардан ортиқ ходимлари кузатиб боришмоқда. Тўйимли ва мазали, тез ҳазм бўладиган ош турлари фестиваль иштирокчиларининг қизиқишини ошириши табиий, албатта.

Фестиваль дастурига мувофиқ, тадбирнинг 1-куни республикамизнинг барча вилоятларидан ташриф буюрган энг сара ошпазлар иштирокида мусобақа ташкил этилмоқда. Унда моҳир ошпазлар ош тайёрлаш борасидаги маҳоратини намойиш қилишяпти. Ош тайёрлаш жараёнида қандай масаллиқлардан фойдаланишдан тортиб, унга солинадиган зираворларгача ҳакамлар томонидан кузатиб борилмоқда.

Фестивалнинг 2-куни янада қизиқарли бўлади. Самарқанд шаҳрининг Алишер Навоий кўчасида хорижлик ошпазлар иштирокида ош пиширилади. Жумладан, Озарбайжон, Малайзия, Қатар, Қувайт, Япония, Покистон, Туркия, Тожикистон, Индонезия, Хитой Халқ Республикаси, Ҳиндистон, Польша, Иордания, Миср Араб Республикаси, Корея Республикаси, Қозоғистон ва бошқа бир қатор давлатлардан дунёга машҳур ошпазлар пазандалик борасидаги иқтидорини намойиш қилишади.

Хорижий ошпазлардан ташқари номдор маҳаллий ошпазлар томонидан кабоб, сомса, ун оши, нўхат шўрак ва бошқа кўплаб миллий гастрономик имкониятларимизни очиб берувчи таомлар ва Самарқанд нони тайёрланиши кўзда тутилган.

Фестивалнинг 3-куни эса иштирокчилар “Самарқанд ош фестивали”нинг асосий тадбири — 7 тонналик ош тайёрлаш жараёнига гувоҳ бўлишади. “Боқий шаҳар” мажмуасида ўтказиладиган тадбирда Олмалиқ кон-металлургия комбинатида махсус тайёрланган катта қозонда 7 тонналик ош тайёрланади. Улкан қозондаги ошни 50 нафар маҳаллий ва 5 нафар чет эллик ошпазлар пиширади.

— Иштирокчилар жараёнларни ўз кўзлари билан кўриб, тайёр таомдан татиб кўриш имкониятига эга бўлади, — дейди Самарқанд вилояти ҳокимининг ўринбосари Рустам Қобилов. — Мазкур ошни тайёрлаш учун 1 700 кг. гуруч, 1900 кг. сариқ сабзи, 480 кг. қизил сабзи, 830 кг. қўй гўшти, 830 кг. мол гўшти, 130 кг. думба, 350 литр ўсимлик ёғи, 200 кг. пиёз, 100 кг. нўхат, 170 кг. майиз, 5 кг. зира, 3 кг. мурч, 17 кг. қорақанд, 50 кг. туз, 450 литр сув ва талабга биноан зиғир ёғи ишлатилиши кўзда тутилган. 7 тонналик ош пишириладиган қозон узунлиги 4,5 метр, баландлиги 2 метрни ташкил қилади. Тайёрланган ош меҳрибонлик уйлари, ногиронлиги бўлган болаларга ихтисослаштирилган мактаб-интернатлари, қариялар уйлари каби муассасаларга етказиб берилади.

Самарқанддаги 3 кун давом этадиган фестивалда 200 дан ортиқ ошпаз иштирокида мусобақалар ташкил этилади. 20 турдаги ноёб ош тайёрланиб, ошпазлардан маҳорат дарслари, хорижий мамлакатларнинг ошларини тайёрлаш жараёнлари, ҳунармандчилик ва шарқ ширинликлари кўргазмалари ташкил этилади. Шунингдек, маданий кўнгилочар тадбирлар ўтказилиб, концерт дастурлари намойиш қилинади.

Хуллас, ушбу халқаро фестиваль давомида “Самарқанд оши” — нафақат таом, балки халқимиз меҳмондўстлиги, бағрикенглиги ва маданий бойлигининг тимсоли сифатида намоён бўлади.