Россия Мудофаа вазирлиги Новгород вилоятида жойлашган Россия президенти Владимир Путин қароргоҳига Украина дронлари томонидан ҳужум уюштирилгани ҳақида далилларни тақдим этди. Бу ҳақида BILD нашри хабар берди.

Билдирилишича, мустақил кузатувчилар далил сифатида тақдим этилган материалларнинг ишончлилигига шубҳа билан қарамоқда.

Россия Мудофаа вазирлигида ўтказилган брифингда генерал майор Александр Романенков Украина томонидан уюштирилган, деб даъво қилинаётган дрон ҳужумига оид материалларни намойиш қилди. Унинг сўзларига кўра, ҳужум дронлар ҳаракат йўналишлари акс этган харита ҳамда дрон қолдиқларининг видеоёзуви билан тасдиқланган.

Романенковнинг таъкидлашича, 91 та дрондан иборат гуруҳ Россия ҳудудига кириб келган. Маълумотларига кўра, тақдим этилган далилларнинг исбот қиймати жуда шубҳали. Намойиш этилган харитага асосан, дронларнинг тахминан 50 таси Брянск ва Смоленск вилоятлари устида уриб туширилган. Бу ҳудудлар Путин қароргоҳидан тахминан 520 километр узоқликда жойлашган.

Мутахассислар фикрича, Украина дронлари ушбу ҳудудларда мунтазам равишда қайд этилади. Шу сабабли, ушбу дронлар ҳақиқатан ҳам Новгород вилояти томон йўл олганини қандай аниқлаш мумкинлиги очиқ қолмоқда. Романенков эса бу масалага аниқ изоҳ бермаган.

Тақдим этилган видеоларда дрон қолдиқлари тасвирланган бўлсада, уларнинг айнан Новгород вилоятида уриб туширилганини тасдиқловчи аниқ белгилар мавжуд эмас. Бундан ташқари, дроннинг Украинага тегишли эканини кўрсатувчи аниқ идентификация белгилари ҳам йўқ.

Мутахассислар таъкидлашича, дрон манбасини аниқлаш учун SIM-ICCID (SIM-карта идентификатори) ёки тўлиқ тармоқ маълумотлари талаб этилади. Бироқ бундай техник маълумотлар ҳам тақдим этилмаган.

Видеолардан бирида юзи ниқобланган ҳарбий хизматчи дронни «Чаклун-Б» туридаги Украина транспорт-разведка дрони сифатида таснифлайди. Унинг айтишича, дронга тахминан олти килограмм портловчи модда ўрнатилган, аммо у портламаган.

Яна бир видеода ўзини ҳужум гувоҳи сифатида таништирган эркак дронлар уриб туширилган пайтда портлаш овозларини эшитганини айтади. Бироқ ушбу шахснинг кимлиги ва воқеага қай даражада алоқадор экани ҳам аниқланмаган.

Тақдим этилган материалларга қарамасдан, мустақил таҳлилчилар ва оммавий ахборот воситалари Россия томонининг баёнотларини эҳтиёткорлик билан қабул қилмоқда. Ҳозирча Путин қароргоҳига Украина дронлари томонидан ҳужум уюштирилгани ҳақидаги даъволарни тўлиқ тасдиқловчи далиллар тақдим этилмаган.