Rossiya Mudofaa vazirligi Novgorod viloyatida joylashgan Rossiya prezidenti Vladimir Putin qarorgohiga Ukraina dronlari tomonidan hujum uyushtirilgani haqida dalillarni taqdim etdi. Bu haqida BILD nashri xabar berdi.

Bildirilishicha, mustaqil kuzatuvchilar dalil sifatida taqdim etilgan materiallarning ishonchliligiga shubha bilan qaramoqda.

Rossiya Mudofaa vazirligida oʻtkazilgan brifingda general mayor Aleksandr Romanenkov Ukraina tomonidan uyushtirilgan, deb daʼvo qilinayotgan dron hujumiga oid materiallarni namoyish qildi. Uning soʻzlariga koʻra, hujum dronlar harakat yoʻnalishlari aks etgan xarita hamda dron qoldiqlarining videoyozuvi bilan tasdiqlangan.

Romanenkovning taʼkidlashicha, 91 ta drondan iborat guruh Rossiya hududiga kirib kelgan. Maʼlumotlariga koʻra, taqdim etilgan dalillarning isbot qiymati juda shubhali. Namoyish etilgan xaritaga asosan, dronlarning taxminan 50 tasi Bryansk va Smolensk viloyatlari ustida urib tushirilgan. Bu hududlar Putin qarorgohidan taxminan 520 kilometr uzoqlikda joylashgan.

Mutaxassislar fikricha, Ukraina dronlari ushbu hududlarda muntazam ravishda qayd etiladi. Shu sababli, ushbu dronlar haqiqatan ham Novgorod viloyati tomon yoʻl olganini qanday aniqlash mumkinligi ochiq qolmoqda. Romanenkov esa bu masalaga aniq izoh bermagan.

Taqdim etilgan videolarda dron qoldiqlari tasvirlangan boʻlsada, ularning aynan Novgorod viloyatida urib tushirilganini tasdiqlovchi aniq belgilar mavjud emas. Bundan tashqari, dronning Ukrainaga tegishli ekanini koʻrsatuvchi aniq identifikatsiya belgilari ham yoʻq.

Mutaxassislar taʼkidlashicha, dron manbasini aniqlash uchun SIM-ICCID (SIM-karta identifikatori) yoki toʻliq tarmoq maʼlumotlari talab etiladi. Biroq bunday texnik maʼlumotlar ham taqdim etilmagan.

Videolardan birida yuzi niqoblangan harbiy xizmatchi dronni “Chaklun-B” turidagi Ukraina transport-razvedka droni sifatida tasniflaydi. Uning aytishicha, dronga taxminan olti kilogramm portlovchi modda oʻrnatilgan, ammo u portlamagan.

Yana bir videoda oʻzini hujum guvohi sifatida tanishtirgan erkak dronlar urib tushirilgan paytda portlash ovozlarini eshitganini aytadi. Biroq ushbu shaxsning kimligi va voqeaga qay darajada aloqador ekani ham aniqlanmagan.

Taqdim etilgan materiallarga qaramasdan, mustaqil tahlilchilar va ommaviy axborot vositalari Rossiya tomonining bayonotlarini ehtiyotkorlik bilan qabul qilmoqda. Hozircha Putin qarorgohiga Ukraina dronlari tomonidan hujum uyushtirilgani haqidagi daʼvolarni toʻliq tasdiqlovchi dalillar taqdim etilmagan.