Хитойлик инвесторлар Риштон туманида парфюмерия саноатини ривожлантиришга катта қизиқиш билдирмоқда.

Шу мақсадда Риштон тумани ҳокимлигида хитойлик инвесторлар билан парфюмерия маҳсулотлари ишлаб чиқариш, мазкур соҳада хизмат кўрсатиш тармоқларини йўлга қўйиш ҳамда замонавий парфюмерия заводи барпо этиш масалалари юзасидан музокаралар ўтказилди.

Ташриф доирасида хитойлик тадбиркорлар делегацияси тумандаги бир қатор ҳудудларда бўлиб, амалга оширилиши мумкин бўлган инвестиция лойиҳалари учун мос жойлар билан танишди. Шунингдек, меҳмонларга туманда фаолият кўрсатаётган маҳаллий саноат зоналари ҳамда ушбу ҳудудларда хорижий инвесторлар учун яратилган шарт-шароитлар ҳақида батафсил маълумот берилди.

Делегация аъзолари саноат зоналари фаолиятини ўрганиш, шунингдек, яқинда иш бошлаган Хитой корхонаси тажрибаси билан танишиш имкониятига эга бўлди. Ушбу жараёнда юртимизда фаолият олиб бораётган хитойлик тадбиркорлар билан ўзаро тажриба алмашиш ҳам амалга оширилди.

— Юзма-юз мулоқотлар давомида парфюмерия саноатини жаҳон андозалари даражасида ривожлантириш, экспортбоп маҳсулотлар ишлаб чиқариш ҳамда мазкур йўналишда малакали мутахассислар тайёрлаш бўйича келишувларга эришилди, — деди Риштон тумани ҳокими ўринбосари Бахтиёр Рўзалиев. — Учрашув якунида истиқболли лойиҳаларни амалга ошириш юзасидан аниқ вазифалар белгиланди.

Ботир МАДИЁРОВ, «Халқ сўзи».