Ботир МАДИЁРОВ/«Халқ сўзи». Бир пайтлар Риштон тумани мазаси тил ёрар қандак ўриклари билан машҳур бўлган. Афсуски, эътиборсизлик туфайли яқин йилларгача Риштоннинг худди кулолчилик сингари ўзига хос бренди бўлган қандак ўриги тобора камайиб кетаётган эди.

Бугун бу борада вазият ижобий томонга ўзгариб, илм-фан ютуқлари асосида замонавий боғлар ташкил этишга жиддий эътибор қаратилмоқда. Айни пайтда туманда қарийб 4 минг гектар мевазор боғлар бўлса, шундан 2,5 минг гектари ўрикзор, 1,1 минг гектари қандак ўрик боғлари ҳисобланади. Ўз навбатида, босқичма-босқич самарасиз, кам ҳосилли боғлар ўрнида интенсив технологиялар ёрдамида янги боғлар барпо этилмоқда.

Ҳозирда Риштон ўриги табиий ва қуритилган ҳолда МДҲ, Осиё ва Европа қитъаси мамлакатларига экспорт қилинмоқда. Туманнинг «Хуррамобод» МФЙда яшовчи тадбиркор Иномжон Қурбонов хонадонида ўрикни қуритиб, ундан баргак тайёрлаб маҳаллий ҳамда хориж бозорларига етказиб беради. Бу иш билан 50 нафарга яқин маҳалладошларини таъминланган. Эътиборлиси, бугунги кунда маҳалладаги 50 дан зиёд хонадонда ўрик баргаги тайёрланади.

— Туманда қуритилган ўрик савдоси учун махсус бозор ҳам ташкил этилган, — дейди тадбиркор И. Қурбонов. — Шу тариқа тумандан ҳар ҳафта ўртача 200 тонна қуритилган ўрик экспортга жўнатилади.