Футболчиларнинг бозор қийматини баҳолаш бўйича тадқиқотлар олиб борувчи «Transfermarkt» портали Испания Ла Лигасида тўп сураётган футболчиларнинг янгиланган нархларини эълон қилди.

Унга кўра, «Реал Мадрид» клуби футболчиларининг нархи сезиларли даражада пасайган. Янгиланишдан сўнг Жуд Беллингем ва Родригонинг қиймати 20 миллион евро, Эндрик ҳамда Федерико Вальверденинг баҳоси эса 10 миллион еврога туширилди.

Шунингдек, трансфер қиймати камайтирилган футболчилар орасида «қаймоқранглилар»нинг қуйидаги футболчилари ҳам бор:

• Тибо Куртуа;
• Андрей Лунин;
• Антонио Рюдигер;
• Фран Гарсия;
• Ферлан Менди;
• Трент Александр-Арнолд;
• Дани Карвахаль;
• Браим Диас.

Шу билан бирга, Винисиус Жуниор, Дани Себальос, Эдуардо Камавинга, Рауль Асенсио, Давид Алаба, Дин Хёйсен каби футболчиларнинг нархлари ўзгаришсиз қолдирилди.

«Transfermarkt» портали бу гал фақатгина «Реал Мадрид»нинг 3 нафар футболчисининг баҳосини оширди.

Жамоанинг испаниялик ҳимоячиси Альваро Каррераснинг олдинги нархи 50 миллион еврони ташкил этган бўлса, янгиланишдан сўнг унга 60 миллион евро миқдорида баҳо берилди.

Хаби Алонсо жамоасида муҳим ўрин тутаётган Арда Гюлернинг нархи ҳам бу гал сезиларли даражада ошди. Туркиялик футболчининг олдинги қиймати 60 миллион евро эди. Янгиланишдан сўнг эса у 90 миллион еврони ташкил этмоқда.

Шунингдек, жамоа етакчиси Килиан Мбаппенинг нархи ҳам 20 миллион евроға оширилиб, айни пайтда 200 миллион еврони ташкил қилмоқда.

«Барселона»да эса нархлар янгиланишидан сўнг катта ўзгаришлар кузатилмади. «Transfermarkt» портали Каталония клубининг кўплаб футболчиларининг баҳосини ўзгаришсиз қолдирди.

Жумладан, қуйидаги футболчиларнинг нархлари ўзгармади:

• Ферран Торрес;
• Руни Барджи;
• Маркус Рэшфорд;
• Дани Ольмо;
• Гави;
• Кунде;
• Балде;
• Пау Кубарси;
• Ламин Ямал.

Янгиланишдан сўнг «Барселона» сафида энг кўп нархи туширилган футболчи Рафинья бўлди. Унинг трансфер қиймати 90 миллион еврони ташкил этган бўлса, эндиликда 80 миллион еврога туширилди.

Шунингдек, Роберт Левандовски, Рональд Араухо, Андреас Кристенсен, Марк-Андре тер Штеген ва Шченсны каби футболчиларнинг ҳам нархлари пасайди.

«Барселона»да нархи ошган футболчилар қаторида эса Хуан Гарсия, Эрик Гарсия, Жерард Мартин, Дро Фернандеш, Фермин Лопес каби ўйинчиларни кўрсатиш мумкин. Айниқса, Ферминнинг баҳоси янгиланишдан сўнг 10 миллион еврога оширилди.