Фото: Видеодан кадр

Ижтимоий тармоқларда мактабларнинг бирида катта ёшли уч киши бошланғич синф ўқувчисини синфдан мажбуран олиб чиқиб кетгани акс этган видео тарқалди. Болалар омбудсмани мазкур ҳолат юзасидан маълумот берди.

Маълум бўлишича, ҳолат жорий йилнинг 5 сентябрь куни Қорақалпоғистон Республикасининг Элликқалъа туманидаги 28-мактабнинг 1-синф ўқувчиси бўлган Х.Ё. билан содир бўлган. Ўша куни боланинг онаси С.Ш. дарс жараёнини бузган ҳолда синфга кириб бориб, ўқитувчи уни тўхтатишга уринишига қарамасдан, куч ишлатиб мажбуран ўғлини синфдан олиб кетган.

Қайд этилишича, ҳолат юзасидан С.Ш. ва бошқа шахсларга нисбатан маъмурий ҳуқуқбузарликка оид тегишли ҳужжатлар тўпланиб, судга юборилган. Мазкур иш бугун, 20 сентябрь куни судда кўриб чиқилади.

“Ушбу вазият боланинг ким билан яшашига оид қариндошлар ўртасидаги низо оқибатида юзага келган бўлиб, мазкур масала юзасидан ҳужжатлар суд тартибида ҳал қилиниши учун тақдим этилган”, дейилади хабарда.

Қўшимча қилинишича, Х.Ё.нинг ҳозирда таълим олиш ҳуқуқи тикланиб, бола мактабда ўқишини давом эттирмоқда.