Фото: The Sun

Гарция ижтимоий тармоқларда қора танлилар ва мусулмонларни камситувчи ирқий ҳақоратларни бир неча бор ишлатди, дея хабар беради «Eurosport» нашри. Бу эса унинг WBA'дан четлатилишига сабаб бўлди. Бу ҳақда ташкилот президенти Маурисио Сулейман «Х» саҳифасида маълум қилди.

«WBA президенти сифатидаги ваколатимдан фойдаланиб, мен Раян Гарцияни ташкилотимизнинг барча фаолиятидан четлатяпман. Биз камситишнинг ҳар қандай шаклини рад этамиз», деб ёзди Сулейман.

Раян Гарция охирги жангини апрель ойида Девин Хейнига қарши ўтказиб, очколар ҳисобига кўра ғалаба қозонганди. Аммо кейинчалик у допинг-тестдан ўта олмагани сабабли бир йиллик дисквалификацияга учраган ҳамда Хейни билан жанг натижаси бекор қилинганди.

25 ёшли енгил вазнда собиқ WBA вақтинчалик чемпиони Гарция энди барча WBA фаолиятидан четлаштирилди.

Боксчи ҳақоратга тўла постини ўчириб ташлаган. Шунингдек ўз сўзларига изоҳ бериб, кимнидир хафа қилган бўлса, кечирим сўрашини билдирган. Гарциянинг оиласи ҳам унинг ушбу ҳақоратларини кучли депрессия ва руҳий саломатлик билан боғлиқ муаммолар билан курашаётгани ҳақда баён қилган.

Аввалроқ Профессионал бокснинг оғир вазн тоифасида мутлақ жаҳон чемпиони Александр Усик Халқаро бокс федерацияси (IBF) чемпионлиги унвонидан воз кечаётганини маълум қилганди.