Кеча, 17 декабрь куни Қатарда ташкил этилган Интерконтинентал кубок мусобақасининг финал ўйини бўлиб ўтди. Унда Европа чемпионлар лигасининг амалдаги ғолиби Франциянинг ПСЖ клуби ва Либертадорес чемпионлар лигаси ғолиби Бразилиянинг «Фламенго» жамоалари ўзаро тўқнаш келди.

Учрашувда ҳисоб 38-дақиқада ПСЖнинг грузиялик футболчиси Хвича Кварацхелия томонидан очилди. Биринчи бўлим 1:0 ҳисобида якунланди.

Иккинчи бўлимнинг 62-дақиқасида «Фламенго» жамоаси ҳисобни тенглаштирди. Киритилган голга Жоржиньо муаллифлик қилди. Ўйиннинг асосий вақти 1:1 ҳисобидаги дуранг натижа билан якунланди.

Пенальтилар сериясида эса хатолар кўп бўлди. ПСЖдан «Олтин тўп» соҳиби Усмон Дембеле ва Франция терма жамоаси аъзоси Брэдли Баркола зарбада адашган бўлса, «Фламенго» клубининг тўртта зарбасини ПСЖнинг россиялик посбони Матвей Сафонов қайтаришга муваффақ бўлди. Серия 2:1 ҳисобида Париж клубининг ғалабаси билан якунланди.

Шу тариқа Луис Энрике бошчилигидаги жамоа Франция 1-дивизиони ва Европа чемпионлар лигаси ғолиблигидан сўнг, Интерконтинентал кубок мусобақасининг бош совринига ҳам эга чиқди.