Пойтахтнинг қатор туманларида тўлиқ ҳужжатлар тўпламига эга бўлмаган 59 та объектда қурилиш ишлари бутунлай тўхтатилди, деб хабар бермоқда Тошкент шаҳар ҳокимлиги ахборот хизмати.

Унда айтилишича, тўлиқ ҳужжатлар тўпламига эга бўлмаган 59 та объектда қурилиш ишлари бутунлай тўхтатилиб, электр таъминотидан узиб қўйилган.

Жумладан, Олмазор туманида 5 та, Чилонзор туманида 5 та, Миробод туманида 8 та, Мирзо Улуғбек туманида 7 та, Сергели туманида 3 та, Учтепа туманида 2 та, Яккасарой туманида 2 та, Янгиҳаёт туманида 17 та, Яшнобод туманида 3 та, Юнусобод туманида 4 та ҳамда Бектемир туманида 3 та объектда қурилиш ишларини давом эттириш тўхтатилган.

Бундан ташқари, ҳокимлик уй-жой харид қилмоқчи бўлган фуқароларни огоҳликка чақириб, тавсиялар берди. Жумладан:

• сотиб олаётган кўчмас мулкка оид барча ҳужжатларнинг асл нусхаларини (кадастр, экспертиза хулосалари ва кенгаш қарорлари, техник кўрик далолатномаси) талаб қилиш ва уларни синчковлик билан текшириш;
• сотувчиларга пулни нақд ёки норасмий йўллар билан бермаслик, шартноманинг барча бандларини диққат билан ўрганиб чиқиш;
• қурувчи ёки объектнинг қонунийлиги хусусида озгина шубҳа туғилса, шунингдек, компания ҳужжатларни тақдим этишни пайсалга солса, Тошкент шаҳар ҳокимлигининг расмий ботига мурожаат этиш тавсия этилди. Мурожаат ботида объектнинг қонуний мақоми ҳақида маълумот берилади.