Наманган вилоятида хизмат вазифасидан суиистеъмол қилган божхона ходимига нисбатан жиноят иши қўзғатилди. Давлат хавфсизлик хизмати ходимлари томонидан Коррупцияга қарши курашиш доирасида ўтказилган тезкор-қидирув тадбирлари натижасида, «Учқўрғон» чегара божхона постида ишловчи божхона назорати ва расмийлаштирув гуруҳи инспектори пора олаётган вақтида қўлга олинди.

Аниқланишича, инспектор Давлатобод туманида яшовчи, 1993 йилда туғилган фуқаронинг хориждан олиб келган 57 дона «Iphone 16 PRO MAX» телефон қурилмаларини Тошкент халқаро аэропортида хизмат қилувчи бошқа божхона ходими орқали IMEI-коди бўйича расмий рўйхатдан ўтказиб беришни ваъда қилган. Бунинг эвазига у ҳар бир телефон учун 100 АҚШ доллардан, жами 5700 АҚШ доллари талаб қилган. Шунингдек, фуқаронинг илгари чет элдан декларациясиз олиб кирган кийим-кечаклари учун чора кўрмагани эвазига яна 400 АҚШ доллари сўраган.

Пора олиш жараёни 2025 йилнинг 11 ва 14 июль кунлари бошланган. Ушбу кунларда инспектор сўралган маблағдан 900 АҚШ доллари эквивалентидаги 11 миллион 317 минг сўмни ўзи ва қариндошига тегишли бўлган банк пластик карталарига ўтказдириб олган.

Аммо 16 июль куни у яна 1000 АҚШ долларига тенг бўлган 12 миллион 550 минг сўмни қариндошининг банк картасига ўтказдираётган вақтда Давлат хавфсизлик хизмати, Бош прокуратура ҳузуридаги Департамент ва Божхона қўмитаси ходимлари томонидан қўлга олинди. У пора олаётган вақтида ашёвий далиллар билан ушланган.

Мазкур ҳолат юзасидан божхона инспекторига нисбатан Жиноят кодексининг 168-моддаси 3-қисми «в» банди (фирибгарлик) ва 28,211-моддаси 1-қисми (пора олишга суиқасд) билан жиноят иши қўзғатилди. Унга нисбатан қамоқ эҳтиёт чораси қўлланилган бўлиб, ҳозирда тергов ҳаракатлари олиб борилмоқда.