Namangan viloyatida xizmat vazifasidan suiisteʼmol qilgan bojxona xodimiga nisbatan jinoyat ishi qoʻzgʻatildi. Davlat xavfsizlik xizmati xodimlari tomonidan Korrupsiyaga qarshi kurashish doirasida oʻtkazilgan tezkor-qidiruv tadbirlari natijasida, “Uchqoʻrgʻon” chegara bojxona postida ishlovchi bojxona nazorati va rasmiylashtiruv guruhi inspektori pora olayotgan vaqtida qoʻlga olindi.

Aniqlanishicha, inspektor Davlatobod tumanida yashovchi, 1993-yilda tugʻilgan fuqaroning xorijdan olib kelgan 57 dona “Iphone 16 PRO MAX” telefon qurilmalarini Toshkent xalqaro aeroportida xizmat qiluvchi boshqa bojxona xodimi orqali IMEI-kodi boʻyicha rasmiy roʻyxatdan oʻtkazib berishni vaʼda qilgan. Buning evaziga u har bir telefon uchun 100 AQSH dollardan, jami 5700 AQSH dollari talab qilgan. Shuningdek, fuqaroning ilgari chet eldan deklaratsiyasiz olib kirgan kiyim-kechaklari uchun chora koʻrmagani evaziga yana 400 AQSH dollari soʻragan.

Pora olish jarayoni 2025-yilning 11 va 14-iyul kunlari boshlangan. Ushbu kunlarda inspektor soʻralgan mablagʻdan 900 AQSH dollari ekvivalentidagi 11 million 317 ming soʻmni oʻzi va qarindoshiga tegishli boʻlgan bank plastik kartalariga oʻtkazdirib olgan.

Ammo 16-iyul kuni u yana 1000 AQSH dollariga teng boʻlgan 12 million 550 ming soʻmni qarindoshining bank kartasiga oʻtkazdirayotgan vaqtda Davlat xavfsizlik xizmati, Bosh prokuratura huzuridagi Departament va Bojxona qoʻmitasi xodimlari tomonidan qoʻlga olindi. U pora olayotgan vaqtida ashyoviy dalillar bilan ushlangan.

Mazkur holat yuzasidan bojxona inspektoriga nisbatan Jinoyat kodeksining 168-moddasi 3-qismi “v” bandi (firibgarlik) va 28,211-moddasi 1-qismi (pora olishga suiqasd) bilan jinoyat ishi qoʻzgʻatildi. Unga nisbatan qamoq ehtiyot chorasi qoʻllanilgan boʻlib, hozirda tergov harakatlari olib borilmoqda.