Фото: Reuters

Франция бўлажак Олимпиада ўйинлари учун Сена дарёсига қўйилган баржада учар такси порти ҳам жойлашишини тасдиқлади. «Aeroports de Paris SA» томонидан қуриладиган вертипорт Париж марказидаги «Austerlitz» темир йўл вокзали яқинида жойлаштирилади. Бу ҳақда «Bloomberg» нашри хабар бермоқда.

Маълум қилинишича, Париж мэрияси лойиҳага қарши бўлиб, учар таксиларнинг кўп энергия талаб қилишини ва хавфли эканлигини иддао қилмоқда. Шу боис ҳозирча Олимпиада ўйинлари вақтида улардан фойдаланиш масаласига аниқлик киритилмаган.

Икки ўриндиқли «VoloCity» таксиларини ишлаб чиққан Европа стартапи «Volocopter GmbH» ҳали тижорат парвозларини тартибга солувчи сертификатни олмаган. Шунга қарамай, компания Олимпиада вақтида кўргазмали парвозларни амалга оширишни режалаштирмоқда. Ўз навбатида, президент Эммануэль Макрон бу янгиликни Франция технологик инновацияларининг рамзи сифатида намойиш қилишни қўллаб-қувватлаган.

Парижнинг ҳақиқий маънодаги учар таксилари шу йилнинг 31 декабрдан эрталаб соат 8:00дан кечки 5:00гача ишлайди. Расмий қарорга кўра, синов муддати давомида соатига атиги иккита рейс ва жами 900 та рейсга рухсат берилади. Ҳукумат ушбу чекловларни белгилашда шаҳар расмийлари ва «Яшиллар» партияси билан келишувга тайёрлигини билдирган.

Париж мэрияси ҳукумат рухсатига қарши қонуний чоралар кўришни режалаштирмоқда. Маъмуриятга кўра, ушбу таксилар шовқиннинг ошишига, ҳавони қўшимча ифлосланишига ва юқори энергия истеъмолига олиб келади. Экофаол Ден Лертнинг фикрича, лойиҳа фақат бойларга фойда келтиради.

«Volocopter» вакилининг таъкидлашича, уларнинг таксилари мавжуд транспорт тизимларини тўлдириш учун мўлжалланган ва компания муаммоларни ҳал қилишга тайёр. Компания сертификатлаштириш жараёнини давом эттириш учун молиялаштиришни таъминлаган. Аммо инвесторлар ёки молиялаштириш тафсилотларини ошкор қилмаган.

Аввалроқ, кўзга кўринмас ниқобли қалпоқлар кашф қилингани ҳақида хабар берилганди.