Маълумки, айни кунларда юртимиз бўйлаб Ўзбекистон Республикаси давлат мустақиллигининг 30 йиллигига бағишлаб, «Янги Ўзбекистонда эркин ва фаровон яшайлик» шиори остида маданий-маърифий тарғибот ташвиқот тадбирлари ташкил этилмоқда. Шу муносабат билан «Ўзбекконцерт» давлат муассасаси томонидан бугун, яъни 6 июнь куни соат 19:00да пойтахтимиздаги «Туркистон» санъат саройининг ёзги амфитеатрида «Кўнгилларда Ватан мадҳи» деб номланган концерт дастури тақдим этилди.

Юксак ватанпарварлик ғояларини тараннум этиш, халқимизга хос ўзаро аҳил-иноқлик ва меҳр-оқибат туйғуларини мустаҳкамлаш, инсонларга хушкайфият улашиш мақсадида ташкил этилган мазкур концерт дастурида «Ниҳол» давлат мукофоти совриндорлари ҳамда таниқли эстрада хонандалари иштирок этишди.

Мазкур концерт дастури Муассаса томонидан ёш истеъдодларни кашф этиш, уларни қўллаб-қувватлаш ва имконият яратиш борасидаги амалга оширилаётган ишларнинг узвий давоми бўлиб, бунда ўз ижоди билан фаоллик кўрсатаётган бир қатор ёш хонандалар мухлисларга манзур қўшиқларини тақдим этишиб, уларга хушкайфият улашишди.

Ўйин-кулгу ва кўтаринки кайфиятга бой бўлган мазкур дастурда томошабинлар орасидан ҳам ижодга мойил истеъдодлар саҳнага таклиф этилди. Эътиборлиси, улар орасида 3 ёшдан 12 ёшгача бўлган болажонларнинг ижро этган шеъру қўшиқлари томошабинларнинг олқишларига сазовор бўлди.