Архив фото

Германиянинг «Transfermarkt» нашри Ўзбекистоннинг энг қиммат футболчилари ўнлигини эълон қилди. Рўйхатда хорижда тўп сураётган 9 ва миллий чемпионатимиздан бир нафар чарм тўп устаси киритилган.

Ўзбекистон миллий терма жамоаси ҳамда Россиянинг «ЦСКА» клуби футболчиси Аббосбек Файзуллаевнинг нархи 1 миллион еврога қимматлашиб, ҳозирда 6 млн еврога баҳоланмоқда. Бу қиймат уни энг қиммат ўзбекистонлик футболчи бўлишини таъминлади.

Италиянинг «Рома» клуби аъзоси Элдор Шомуродовнинг нархи 5 миллион еврога баҳоланган ва у ҳозирда ўзбек футболчилари ичида иккинчи ўринда қайд этди.

БААнинг «Шабоб ал-Аҳли» футболчиси Азиз Ғаниевнинг нархи эса 500 минг еврога арзонлаган ва портал уни 3 миллион еврога баҳолаган. Шундай бўлсада, Азиз энг қиммат ўзбек футболчилари кучли учлигидан жой олди.

Франциянинг «Ланс» жамоаси марказий ҳимоячиси Абдуқодир Ҳусановнинг эса нархи кўтарилди ва айни пайтда футболчининг трансфер қиймати 2,5 миллион еврога етган. Ҳусанов ҳозирда Ўзбекистон футболчилари ўртасида энг қиммат тўртинчи футболчига айланди.

Туркия клубида ўйнаётган Отабек Шукуровнинг нархи 2,5 миллион евродан 2,2 миллион еврога камайган. У қиймати бўйича бешинчи ўринда бормоқда.

Шунингдек, Жалолиддин Машариповнинг 1,5 миллион, Игор Сергеев, Одилжон Ҳамробеков ва Ҳусниддин Алиқуловларнинг трансфер суммаси 1,2 млн евро сифатида қайд этилган.

Ўзбекистоннинг энг қиммат футболчилар 10 лигини Остон Ўрунов 1 млн евролик нарх билан якунлаган.