Франция пойтахтида ўтказилаётган ёзги Олимпиада ўйинларида ўзбек спортчилари ўз иштирокларини давом эттирмоқда.

Енгил атлетика бўйича Ўзбекистон терма жамоаси аъзоси Шоҳруҳ Давлатов «Париж-2024» ёзги Олимпиада ўйинларидаги иштирокини якунлади.

Эркаклар ўртасида 42 км 195 метр масофага кечган марафонда қатнашган ҳамюртимиз финишгача етиб кела олмади.

Ҳамюртимиз Шоҳруҳ Давлатов 30-километрдан сўнг ўзини ёмон ҳис қилгани боис трассадан четга чиқди ва финишгача бормасдан мусобақани якунлашга қарор қилди.

Ушбу баҳсда эфиопиялик Тамират Тола янги Олимпия рекорди (2:06.26) билан маррага биринчи бўлиб етиб келди. Кумуш медал белгиялик Башир Абдига (2:06.47) насиб этган бўлса, кениялик Бенсон Кипруто (2:07.00) кучли учликни якунлаб берди.

Қайд этиш керакки, Шоҳруҳ баҳсларни жуда яхши бошлаганди. Марафоннинг дастлабки 15 километрида ҳам у етакчи 15 нафар спортчи ичида кетаётганди.

Баҳсларда 81 нафар атлет қатнашди ва уларнинг 10 нафари финишга етиб бора олмади.

Бунгача Ҳасанбой Дўсматов ва Асадхўжа Мўйдинхўжаев «Париж-2024»нинг бокс беллашувларида олтин медалларни қўлга киритганди.