Ўзбекистон элчиси Абат Файзуллаев Италия чорвадорлари уюшмаси (AIA) бош директори Мауро Донда ва Италия миллий қуёнчилик уюшмаси (ANCI) президенти Серджо Помпа билан учрашув ўтказди.

Мулоқот чоғида ушбу уюшмалар мамлакатимиз идоралари ва тадбиркорлари билан бир неча йилдан бери олиб бораётган ҳамкорлиги натижасида эришилган катта ютуқ – Тошкент вилояти Қуйи Чирчиқ туманида барпо этилган дунёдаги энг йирик ва энг замонавий қуёнчилик мажмуаси фаолияти муҳокама қилинди.

Италия технологиялари асосида барпо этилган қуёнчилик мажмуаси йилига 2 миллион қуён етиштириш, 2 минг тонна қуён гўшти, қуёнлар учун 80 минг тонна тўлиқ рационли омихта ем ишлаб чиқариш қувватига эга. Жараёнлар чиқиндисиз услубда ташкил этилган бўлиб, бу ерда 36 минг тонна табиий ўғит ҳам ишлаб чиқарилади, қуён терилари эса қайта ишлашга йўналтирилади.

Мамлакатимизда яратилган корхонанинг асосий афзаллиги – бу ерга Италия томонидан энг юқори сифатли генетик материал ва наслли қуён урғочилари етказиб берилган. Натижада корхона наслли қуёнлар авлодини кўпайтириш имкониятига эга бўлган.

Италия миллий қуёнчилик уюшмаси мутахассислари корхона билан яқиндан ҳамкорлик қилиб, барча жараёнларни онлайн тарзда кузатиб боради. Бунинг натижасида ҳайвонлар соғлиги, берилаётган ем таркиби, қўлланиши лозим бўлган дориворлар бўйича тавсиялар берилади.

Ҳозирда корхона қуён гўштини қўшни бозорларга муваффақиятли экспорт қилмоқда ва янги салоҳиятли импортчи мамлакатлар билан музокара олиб бормоқда.