Фото: Сирожиддин Воҳидов / “Халқ сўзи”

«Ўзгидромет» агентлиги иш ҳафтаси давомида кузатиладиган об-ҳаво маълумотини эълон қилди. Унга кўра, ҳафта ўртасидан бошлаб ҳаво ҳарорати сезиларли даражада кўтарилади.

Бугун, 3 март куни Ўзбекистон ҳудудининг катта қисмида қор ёғиши давом этади ва ҳаво ҳарорати 0-5 даража совуқ атрофида бўлади. Куннинг иккинчи ярмида Қорақалпоғистон Республикаси ва Хоразм вилоятида қор ёғиши тўхтайди.

4 март куни барча вилоятларда ёғингарчиликсиз об-ҳаво бўлиши кутилмоқда. Фақат республиканинг айрим тоғли ҳудудларида бироз қор ёғиши мумкин. Кечаси ва эрталаб ҳали ҳам совуқ антитциклон таъсири сақланиб туради, ҳарорат 2-7 даража совуқ атрофида бўлади.

Кундузи антитциклон Ўзбекистон ҳудудидан аста-секин чекина бошлайди. Ҳарорат 4-7 даража илиққача кўтарилади, аммо бу март ойи боши учун меъёрдан нисбатан пастдир. Республиканинг айрим жойларига туман тушиши мумкин.

5-6 март кунлари Ўзбекистоннинг барча ҳудудлари бўйича ёғингарчиликсиз об-ҳаво бўлиши кутилмоқда. 7 мартда республика бўйича баъзи жойларда (Фарғона водийсидан ташқари) яна ёмғир кўринишидаги ёғингарчилик бўлиши кутилмоқда.

Фақат мамлакатнинг шимолида – Устюртда ва Орол бўйи ҳудудларида ёмғир қорга айланиши мумкин. Ҳафта ўртасидан ҳарорат жадал кўтарила бошлайди ва 6-7- март кунларига келиб, кечалари 5-8 даража илиқни, кундуз кунлари 14-17 даража илиқни, жанубда 20-22 даража илиқни ташкил этади.

3 март ва 7 март кунлари республика бўйича баъзи жойларда шамол тезлиги 17-22 м/с гача кучаяди, айрим жойларда баъзида 23-25 м/с гача кучайиши мумкин.