Ўзбекистонда 2026–2030 йилларда фуқаролик жамиятини ривожлантириш концепцияси лойиҳасини ишлаб чиқиш жараёнига расман старт берилди. Мазкур ташаббус «Юксалиш» умуммиллий ҳаракати томонидан илгари сурилган бўлиб, муҳокамалар очиқ, инклюзив ва кенг жамоатчилик иштирокида ташкил этилмоқда.

Навбатдаги муҳокама Урганч шаҳрида ўтди. Тадбирда Хоразм вилоятидаги нодавлат нотижорат ташкилотлари, илмий-тадқиқот муассасалари, давлат идоралари, маҳаллий ОАВ, фуқаролик жамияти фаоллари ҳамда жамоатчилик вакиллари иштирок этди. Ушбу учрашув фуқаролик жамияти институтларининг ҳудудий даражадаги фикр ва таклифларини йиғиш, концепцияни амалий жиҳатдан бойитиш мақсадида ўтказилди.

Журналистлар уюшмаси Хоразм вилояти бўлими раҳбари Дилбар Бекчонованинг таъкидлашича, концепция лойиҳасининг асосий мақсади — фуқаролик жамияти институтларининг ролини мустаҳкамлаш, давлат ва жамият ўртасидаги ўзаро ишонч ва самарали ҳамкорликни янги босқичга кўтариш ҳамда фуқароларнинг ижтимоий-сиёсий жараёнларда фаол иштирокини кенгайтиришдир.

— Муҳокама жараёнида иштирокчилар томонидан аниқ ечимлар, амалий таклифлар ва муҳим ташаббуслар илгари сурилди. Албатта, бу фикрлар концепция лойиҳасини ишлаб чиқишда инобатга олинади, — деди Дилбар Бекчонова.

Тадбир фуқаролик жамиятининг ҳудудлардаги муаммо ва эҳтиёжларини ўрганишга, шунингдек, жамиятнинг барча қатламлари фикрини концепция лойиҳасига кенг ёйилган тарзда жамлашга хизмат қилди. Мазкур жараённинг очиқлик ва мулоқот руҳида олиб борилаётгани концепциянинг амалий аҳамияти ва самарадорлигини оширишга замин яратади.

Одилбек Одамбоев, «Халқ сўзи».