Фото: Ҳасан Пайдоев / «Халқ сўзи»

Мамлакатимизда кечаётган илмий-маърифий жараёнларни кенгайтириш, аҳоли ва айниқса ёшларни маҳаллий олимлар фаолияти билан яқиндан таништириш, шунингдек, илмий-маърифий туризмни ривожлантириш мақсадида Ўзбекистон Республикаси Фанлар академияси Материалшунослик институтида оммавий ахборот воситалари, туристик компаниялар ҳамда ёшлар учун «Очиқ эшиклар куни» ташкил этилди.  

Кун давомида институт олимлари томонидан экспортга йўналтирилган технологиялар, импорт ўрнини қопловчи маҳсулотлар ва глобал муаммоларни ечишга қаратилган инновацион ишланмалар намойиш қилинди.

Шу куни институтда «ХХI аср — инновацион ғоялар асри» мавзусида Республика илмий-амалий анжумани ҳам бўлиб ўтди. Анжуманда Республиканинг барча ҳудудларидан келган ёш олимлар ўзларининг инновацион ишланмалари билан иштирок этишди.

Сўнгра меҳмонлар иштирокида Осиё минтақасида ягона саналган «Катта Қуёш Қурилмаси» ноёб объекти бўйлаб экскурсия уюштирилди. Муассаса олимлари институтнинг тарихи, фаолияти, инновацион илмий лойиҳалари ҳақида маъруза қилишди.

«Халқ сўзи»