Ўзбекистон миллий терма жамоаси Жаҳон чемпионати саралаш босқичи доирасида Бирлашган Араб Амирликларига қарши сафарда майдонга тушади. Осиё футбол конфедерацияси мазкур ўйин бўлиб ўтадиган стадион ҳамда учрашув вақтларини маълум қилди. Бу ҳақида Ўзбекистон Футбол Ассоциацияси хабар берди.

Маълум қилинишича, Ўзбекистон миллий терма жамоасининг БААга қарши сафардаги баҳси жорий йилнинг 5 июнь куни Абу-Даби шаҳридаги «Al Nahyan Stadium» стадионида бўлиб ўтади. Мазкур учрашув Тошкент вақти билан 21:00 да бошланади.

Маълумот учун, БАА – Ўзбекистон баҳси учун танланган «Al Nahyan Stadium» стадиони кичик ҳажмли бўлиб, 15 минг мухлисга мўлжалланган. Ушбу яшил майдон БААдаги «Аль-Вахда» клубининг уй стадиони ҳисобланади. Аҳамиятлиси шундаки, ушбу жамоа сафида терма жамоамиз аъзоси Ҳожимат Эркинов тўп тепади.

Шунингдек, Ўзбекистон миллий терма жамоаси 2026 йилда АҚШ, Канада ва Мексикада бўлиб ўтадиган Жаҳон чемпионати саралаш босқичи доирасидаги сўнгги баҳсини 10 июнь куни Бунёдкор стадионида Қатарга қарши Ўтказади. Мазкур баҳс Осиё футбол конфедерацияси томонидан соат 18:45 да старт олиши белгиланган.

Айни пайтда Ўзбекистон миллий терма жамоаси «А» гуруҳида 17 очко жамғарган ҳолда 2-ўринни эгаллаб турибди. БААда 13 очко, Қатарда эса 10 очко мавжуд. Бирлашган Араб Амирликлари терма жамоасига қарши сафардаги баҳсда эришиладиган дуранг ҳам Ўзбекистон миллий терма жамоасига Жаҳон чемпионати йўлланмасини тақдим этади.