Сенатнинг Маҳаллий ҳокимият вакиллик органлари фаолиятини кучайтиришга кўмаклашувчи комиссияси раиси Анвар Туйчиев «Эрон–Ўзбекистон» парламентлараро дўстлик гуруҳи раиси Жавад Никбин бошчилигидаги делегация билан учрашди.

Мулоқот чоғида икки мамлакат парламентлари ўртасидаги ҳамкорлик алоқаларини янада мустаҳкамлаш масалалари муҳокама қилинди.

Хусусан, «Ўзбекистон–Эрон» ва «Эрон–Ўзбекистон» парламентлараро дўстлик гуруҳлари фаолиятини янада ривожлантириш, парламентлар даражасида тажриба алмашиш ва қўшма ташаббусларни қўллаб-қувватлаш зарурлиги таъкидланди.

Шунингдек, маҳаллий Кенгашлар фаолиятини ривожлантириш, ҳудудлардаги ташаббусларни қўллаб-қувватлаш ҳамда вакиллик органлари фаолиятида илғор тажрибани қўллаш бўйича ҳамкорлик қилиш масалаларига алоҳида эътибор қаратилди. Бу борада икки томоннинг ҳам доимий мулоқот ва ҳамкорликни йўлга қўйишга тайёрлиги билдирилди.

Томонлар парламентлараро мулоқотни мунтазам давом эттириш, имкониятлардан самарали фойдаланиш ҳамда қўшма ташаббусларни рўёбга чиқариш Ўзбекистон ва Эрон ўртасидаги дўстона алоқаларни янги босқичга олиб чиқишга хизмат қилишини таъкидлади.