Италиянинг Верона шаҳрида ташкил этилган “Samarkanda” савдо компанияси уюшмасининг раҳбари Жузеппе Бортоне билан учрашув бўлиб ўтди.

Ушбу уюшманинг ташкил қилинишидан кўзланган асосий мақсад икки давлат ўртасида савдо-иқтисодий алоқаларнинг ривожланишига кўмаклашиш, инвестициялар жалб қилиш, маҳаллий маҳсулотлар экспортини ошириш, ярмарка ва кўргазмаларда биргаликда иштирок этиш ҳамда маданий-гуманитар соҳаларда ўзаро ҳамкорлик қилиш билан изоҳланади.

Учрашув чоғида мамлакатимизнинг Италиядаги элчихонаси раҳбари сўнгги йиллар давомида Ўзбекистон ва Италия ўртасидаги муносабатларнинг жадал ривожланиб бораётгани, хусусан, яқинда ушбу мамлакатга амалга оширилган олий даражадаги ташриф якунларининг амалий аҳамияти ҳамда иқтисодий дипломатия соҳадаги истиқболли ҳамкорлик тўғрисидаги атрофлича маълумотларни ўртоқлашди.

Қайд этилганидек, ушбу тарихий ташриф доирасида имзоланган савдо-иқтисодий йўналишдаги ҳужжатларнинг умумий қиймати 9 миллиард евродан зиёд эканлиги бу фикрнинг яққол тасдиғидир.

Италия билан энергетика, кимё, металлургия, тўқимачилик, чарм-саноат ва қишлоқ хўжалиги соҳаларида инвестиция, экспорт ва технологик ҳамкорлиги учун барча шарт-шароитлар мавжуд эканлиги, икки давлат ишбилармонларининг ўзаро фаоллиги эса кун сайин ошиб бораётгани таъкидланди.

Уюшма раҳбари Жузеппе Бортоне Ўзбекистон элчихонаси ва мамлакатимиз ишбилармон доиралари билан ҳамкорлик қилишга катта қизиқиш билдирар экан, икки мамлакат ўртасидаги мавжуд салоҳиятни юқори баҳолади.

Унинг айтишича, ўз уюшмаси илк босқичда Ўзбекистоннинг иқтисодий салоҳияти бўйича тақдимотлар ўтказиш, бизнес сафарлари ва учрашувлар ташкил этиш ҳамда уюшма аъзолари сонини оширишга алоҳида эътибор қаратади.

Учрашув якунида томонлар жорий йил октябрь ойида Италиянинг Венето ва Апулия ҳудудларида Ўзбекистоннинг иқтисодий салоҳиятига бағишланган бизнес форумларни ташкил этишга келишиб олди.

Маълумот тариқасида қайд этиш жоизки, “Samarkanda” савдо компанияси уюшмаси жорий йил 30 июнь куни Италиянинг Верона шаҳрида рўйхатдан ўтказилган. Тажрибали адвокат Жузеппе Бортоне ва Италиянинг “Euroimpex S.r.l” компанияси мазкур уюшманинг таъсисчилари ҳисобланади.