Фото: Маданият вазирлиги

Ўзбекистон Республикаси маданият вазирининг тегишли буйруғига асосан, Фаррух Юнусов Ўзбек миллий мақом санъати маркази Бош директори лавозимига тайинланди. Бу ҳақда вазирлик матбуот хизмати хабар берди.

Маълум қилинишича, ушбу тайинлов жамоага Ўзбекистон Республикаси маданият вазирининг биринчи ўринбосари Баҳодир Аҳмедов бошчилигида бўлиб ўтган йиғилишда эълон қилинган. Йиғилишда Марказнинг марказий аппарати ходимлари ҳамда Юнус Ражабий номидаги «Мақом» ансамбли ижодий жамоаси иштирок этган.

Йиғилиш давомида Баҳодир Аҳмедов Фаррух Юнусовни табриклаб, мақом санъати йўналишида янги ташаббус ва амалий ёндашувларни амалга оширишини таъкидлаган. Шунингдек, ўзбек миллий санъатини тарғиб этишда тизимли лойиҳалар устида ишлаш бўйича тегишли топшириқ ва кўрсатмалар берган.

Маълумот учун, Фаррух Юнусов фаолияти давомида Маданият вазирлиги тизимидаги турли муассасаларда –«Ўзбекконсерт» давлат муассасаси ва Маданият вазирлигининг марказий аппаратининг ижодий ва ташкилий лавозимларида фаолият юритган. Шунингдек, у тайинловга қадар Маданият вазирлигининг Ижодкор ёшлар билан ишлаш бўлими бошлиғи лавозимида фаолият юритаётган эди.